Геопортал көмегіне жүгіне аласыз
Бос жер учаскелері туралы ақпарат алғысы келген өңір тұрғындары осы бағытта арнайы жасақталған геопортал көмегіне жүгіне алады.
Естеріңізде болса, бұған дейін облыстық жер қатынастары басқармасы Өскемен, Семей, Аягөз, Зайсан, Риддер, Шемонайха, Алтай, Серебрянка қалалары бойынша бос жер учаскелері мен инженерлік коммуникацияларының электронды карталарын әзірлеген болатын. Геопорталға Шығыс Қазақстан мен Абай облыстарының аумақтарында орналасқан сегіз қала бойынша жер учаскелері, ғимараттар, құрылыстар, көше-жол желісі, инженерлік желілер, бас жоспарлар мен егжей-тегжейлі жоспарлау жобалары цифрлық форматта орналастырылды.
Жергілікті атқарушы органдардың геоақпараттық порталдарына қойылатын бірыңғай талаптарға сәйкес әзірленген аталмыш платформа қазір өңір тұрғындарының игілігіне жұмыс істеуде. Атап айтсақ, жеке тұрғын үй салып, я болмаса жеке шаруашылығын жүргізуді мақсат еткен кез келген тұрғын осы сайт арқылы өзі межелеген жердің сызбасын қағазға басып, өтінішімен бірге бере алады.
Сонымен қатар геоақпараттық портал халыққа және бизнеске өтініш берушімен тікелей байланыссыз электронды форматта техникалық шарттарды беру бойынша қызметтер көрсетуді қамтамасыз етіп, электронды цифрлық қолтаңбаны пайдалана отырып, құжаттарды электронды форматта беруді қамтамасыз етеді. Осылайша, жер алушы мен осындай қызмет көрсетуші арасындағы қағазбастылық азайып, болуы мүмкін жемқорлық фактілерінің қатері төмендеді.
Бұдан бөлек, геопорталда жоғарыда көрсетілген қалаларда жергілікті атқарушы органдар аукционға қоятын жер учаскелері орналасқан «Аукциондар» модулі де бар. Бұл модуль цифрлық режимде жер туралы ақпаратты, электронды картадағы оның орнын, бастапқы құны мен ауданын көруге мүмкіндік береді. Сондай-ақ аталған геопорталда жер учаскелерін онлайн бағалау модулі де орналасқан. Бұл модуль арқылы анықтамалық режимде жер учаскелерінің кадастрлық бағалау құнын есептеуге, сондай-ақ жер салығы мен жалдау ақысының құнын есептеуге мүмкіндік жасалған.
Айзере Сұлтан
