Галина Вишневская Әлем чемпионы атанды

Ел намысын халықаралық жарыстарда қорғап, жақсы қырынан көзге түсіп жүрген шығысқазақстандық Галина Вишневская АҚШ-та өтіп жатқан жастар арасындағы Әлем чемпионатында биатлоннан алтын және күміс медальды жеңіп алды.
Біздің облыстан Сочи Олимпиадасына қатысқан спортшыларымыз құралақан оралып, жанкүйерлерін қуанта алмаған еді. Ал АҚШ-тан жеткен қуанышты хабар ел арасына лезде тарап кетті. Галина із қуып жарысуда жастар арасындағы Әлем чемпионы атанды. Германия спортшысы Луиза Каммер мәреге екінші болып келді. Қола канадалық Сара Будроға бұйырды.
Галина Вишневская 7,5 шақырымдық спринттік жарыста күміс медальға ие болды. Алтынды ресейлік Евгения Павлова иеленді. Қола жүлдені германиялық Аника Кнол еншіледі.
Жасөспірімдер арасындағы қысқы Олимпиаданың күміс жүлдегері Галина Вишневская былтырғы Әлем чемпионатында да спринттік жарыста күміс жүлдеге ие болған-ды. Талантты спортшының шеберлік деңгейінің тез өсуі және тек жеңіс үшін құлшынып күресуі өзінің бапкерлері мен жанкүйерлерін қуантып отыр.

Шығыс-Ақпарат