Ет экспортына ерекше ден қояды
Үржар ауданында атқарылып жатқан игі істер жетерлік. Бұл туралы өңірлік коммуникациялар қызметінде өткен брифингте Үржар ауданының әкімі Серік Зайнулдин айтып берді.
Елбасы Жолдауында жүктелген міндеттер мен Президент Қасым-Жомарт Тоқаевтың тапсырмаларын жүзеге асыру мақсатында ауданда кәсіпкерлерді қолдау, халықты әлеуметтік қорғау және жұмыспен қамтамасыз ету мәселелері бірінші кезекте шешілуде. Бұдан бөлек, туризмді дамытуға ерекше көңіл бөлінуде.
Ағымдағы жыл басынан бері Үржар ауданына 4 миллиард 783 миллион теңгеден астам инвестиция тартылған. Бұл 2018 жылдың осы кезеңімен салыстырғанда әлдеқайда жоғары. Ал бөлшек сауда тауар айналымының көлемі 8 миллиард 957 миллион 700 мың теңгегежетті. Бүгінде аудан көлемінде асыл тұқымды және сүтті бағыттағы мал шаруашылығын дамытуға баса назар аударылуда. Серік Зайнулдиннің айтуынша, биыл жергілікті кәсіпкерлер 350 тонна ет экспорттауды жоспарлап отыр.
Аудандағы «Юбилейный» жауапкершілігі шектеулі серіктестігі мен «Сағади» шаруа қожалығының базасында 400 басқа арналған тауарлы-сүт фермалары іске қосылды, – деді Серік Зайнулдин.
Биыл Мақаншы, Қаратұма, Сегізбай ауылдарындағы су құбырларына қайта жаңғырту жұмыстары жүргізіледі. Бұған 1 миллиардтан астам қаражат бөлінген.
– Алдағы уақытта Көктал, Бақты, Қабанбай, Бестерек, Ақжар, Елтай ауылдарының тұрғындары да сапалы ауызсумен қамтамасыз етіледі, – дейді Серік Зайнулдин.
Брифингте аудан әкімі Үржар ауылында жүзу бассейні салынатынын атап өтті. Бұл «Ауыл – ел бесігі» бағдарламасы аясында жүзеге асырылады. Осылайша, үржарлықтар су спортын дамытуға да ерекше ден қоймақ. Аталмыш нысанның құрылыс жұмыстарына аудандық және республикалық бюджеттен қаражат қарастырылған.Бұдан бөлек,ауданда 60 көппәтерлі тұрғын үй салынады. Жобаның жалпы құны –713 миллион 500 мың теңге.
– Тұрғын үй құрылысы басталмас бұрын электр жарығын тарту, сондай-ақ су, кәріз, жылу жүйелерімен қамтамасыз ету мәселелерін алдын ала шешу қажет. Бүгінде жауапты сала мамандары инженерлік желілерді тарту мақсатында жобалық-сметалық құжаттамаларды әзірлеп, сараптамадан өткізді. Жобаның құны –174 миллион теңге, – деді Серік Зайнулдин.
Үржар ауданындағы мектептерде жаңа оқу жылында 26 роботты техника, жеті химия, сегіз биология, алты физика кабинеттері ашылды. Оған 309 миллион теңгеден астам қаражат бөлінді.
– Көпбалалы және әлеуметтік жағынан аз қамтылған отбасыларда тәрбиеленіп жатқан 2975 бала тегін ыстық тамақпен қамтамасыз етіледі. Сондай-ақ 1-4 сыныптарда оқитын 3143 оқушыға аптасына бес рет 200 грамнан тегін сүт беріледі. Сонымен қатар ас мәзірінде күнделікті 5 грамм бал беру қарастырылған, – деді Серік Зайнулдин.
Ажар Сағатбекова
