Ертістің сол жағалауы спорттық ойын-сауық орнына айналады

Облыс әкімі Даниал АХМЕТОВ Өскемен қаласындағы бірқатар мәдени, спорттық және ойын-сауық нысандарын аралап, шаһарды абаттандыру, жарықтандыру, көлік қозғалысын реттеу мәселелеріне көңіл бөлді, сонымен қатар, жергілікті атқарушы билік өкілдеріне бірқатар нақты міндеттер жүктеді.
Аймақ басшысы алдымен облыстық мешітте болып, оның қазіргі жай-күйімен танысты. Мешіт қызметкерлерінің айтуынша, ғимараттың шатырынан су ағады, кірпіштердің бетіне тұз шыққан, бұл жайт ғимараттың сыртқы кескінін бұзады. Сонымен қатар, мешіт басшылығы терезелердің дұрыс қойылмағанын, даладан терезе жақтаулары арқылы суық ауа кіретінін жеткізді. Мешіттің ең үлкен аспашамы жел соққан кезде шайқалып, теңселеді екен. Соның салдарынан электр желісі тұйықталып, шам істен шығыпты, қазір жанбай тұр.
Аймақ басшысы ғимарат шатырының гидроизоляциясы нашар екенін, ал кірпіштен тұз шығу оның сапасының төмендігінен екенін түсіндірді. Ал люстраны осы айдың ішінде бекітіп, сымдарын ретке келтіру керек, бұл жөнінде аймақ басшысы қала әкімдігіне тапсырма берді.
– Терезені орнатқан мердігер компанияның мамандарын шақыртыңыздар, олар өз қателіктерін түзетсін. Қалған олқылықтарды қала басшылығы алдағы көктемде жөндеп шығады. Ал тұзы шыққан кірпіштерді тазалау үшін оларды арнайы ерітінділермен жуған жөн. Мұнымен қоса, кіреберіс сатыға резеңке төсемелер жаю керек, қазір сатылар өте тайғақ, әсіресе, егде адамдарға бұл өте ыңғайсыз, құлап, мертігіп жатса не болады? – деді ол қалалық әкімдік мамандары мен мешіт қызметкерлеріне.
Бұдан әрі аймақ басшысы Комсомол аралындағы шаңғы және коньки тебу алаңдарына, мұз қалашығына барды. Қысқы спорт түрлерімен айналысып, демалулары үшін қала тұрғындары мен қонақтарына арнап мұнда бірқатар іс-шаралар атқарылыпты. Атап айтар болсақ, 40 пар коньки жалға берілетін үлкен мұз айдыны құйылған, бір жарым шақырымдық шаңғы трассасы жасалған, 400 және 800 метрлік шаңғы жолдары жарықтандырылған, 30 пар шаңғы жабдығын жалға беру бекеті жұмыс істейді, сонымен қатар, екі мұз сырғанағы мен осы жердің ажарын ашып тұрған жаңажылдық шырша бар. Мұнымен қоса, ыстық тағамдар беретін дәмхана, жедел тамақтандыру бекеттері ұйымдастырылған.
Аталмыш демалыс орны жұмыс күндері күндізгі сағат 14.00-ден, ал демалыс күндері сағат 10.00-ден бастап түнгі сағат 23-00-ге дейін қызмет көрсетеді. «Кез келген адам осы жолдар шаңғы тебе алады. Жолдың сапалы болғаны соншалық, көктемгі мезгілге дейін шыдайды» дейді облыстық денешынықтыру және спорт басқармасының басшысы Әбіл Дөңбаев.

Демалыс орнының жағдайымен танысып шыққан аймақ басшысы Даниал АХМЕТОВ оның жұмысына жоғары баға берді.
– Бұл қалалықтар үшін жасалған жайлы, заманауи шаңғы және коньки тебу орталығы екен. Өскемендіктер үшін қала сыртына шығудың еш қажеті жоқ, бәрі жақын. Демалыстың ұйымдастырылу деңгейі де жоғары деңгейде. Ыстық тамақ беру орындары да ұйымдастырылған. Осындай орталықтар қаланың өзге аудандарында және облыстың өзге шаһарларында да болуы тиіс. Жалпы, қысы қарлы еліміздегі шығыс және солтүстік өңірлердің осы бір артықшылығын тиімді пайдаланған абзал, – деді осы ретте аймақ басшысы.
Атап өтерлік жайт, Өскемен қаласының басшылығы жуырда тәжірибе үйрену мақсатымен Мәскеу және Францияның Леон қалаларына барып келген болатын.
Бұдан соң облыс әкімі Славский атындағы жағалаудың бойына аялдап, сонда атқарылатын абаттандыру жұмыстары жөнінде тапсырмалар берді. Бұл маңайдың шамдалдары ауыстырылып, эргономикалық орындықтар қойылады. Қалада 184 пәтер иелері кооперативтері бар. Аймақ басшысы қала әкіміне солардың қызметін ретке келтіруді жүктеп, олардағы аула сыпырушылардың бәрі де өз жұмыстарын талапқа сай атқарулары тиіс екенін қадап айтты.
Осы Стрелка ықшам ауданында «Сәулетай» атты балаларға арналған ойын-сауық саябағы бар. Сол жердің облыс әкімі барғанда қалың қардың астында қаңырап жатқанын көрдік. Оның үстіне бос тұрған саябақ қысқы мерзімде де күзетіледі екен. Аймақ басшысы қала әкімдігінің мамандарына демалыс орнының ішін қардан тазартып, қысқы мерзімде де бұл жер бүлдіршіндер мен олардың ата-аналарының демалысына арналған орын болуы қажет деген тапсырма жүктеді.
– Неге он екі ай қызмет көрсетуі тиіс саябақ жылына тек бес ай жұмыс істеп, қалған уақытта жабық жатуы қажет? Қала басшылығы бұл істі жедел қолға алып, саябақ өз жұмысын бастасын. Егер саябақты қардан тазалап, сауықтыру орны ретінде іске қоссақ, мұнда тұрғындар көптеп тартылатын болады, – деді облыс әкімі.
Былтыр Өскеменде Үлбі өзенінің үстінен Протозанов атындағы жағалау мен Астана көшесін жалғайтын автомобиль көпірі іске қосылған болатын. Бұл үлкен Үлбі көпіріндегі автокөлік ағынын біраз азайтқанмен, жүргізушілер мен жаяу жүргіншілер үшін бірқатар ыңғайсыздықтар туғызған. Себебі, Крылов көшесі, Протозанов көшесі және көпір түйісетін қиылыстағы жол қозғалысы дұрыс реттелмеген. Соның салдарынан таңғы және кешкі қарбалас шақта осы маңда ұзын-сонар көлік кептелістері пайда болады. Қала басшылығы жергілікті полиция бөлімімен бірлесе, осы қиылысқа және көпірдің келесі шетіндегі Астана көшесінің бойына да бағдаршамдар орнатуды жоспарлап отыр. Бұл осындағы көлік ағынын реттеуі тиіс. Осы тұста бұрыннан бері тұрған жаяу жүргіншілерге арналған көпір де бар, оның бойымен ыстық, суық судың, канализацияның құбырлары өтеді. Облыс әкімі сол құбырларға түсетін қысымды азайту үшін олардың үстіне арматуралы бетон құюға кеңес берді.
Сондай-ақ, облыс басшысы «Алтай» стадионында болды. Қаланың қақ ортасындағы бұл спорттық нысанға қыста мұз айдыны құйылады. Облыстық денешынықтыру және спорт басқармасының басшысы Әбіл Дөңбайевтың айтуынша, күніне мұнда 2 мыңнан астам адам келіп, коньки тебеді. Осы стадионға келушілер үшін конькилерді жалға беретін, киім ауыстыратын орындар және шағын дәмхана жұмыс істейді.
– Бұл – қаланың ортасындағы үлкен мұз айдындарының бірі, халық та көп келеді. Сол себепті бұл жер барынша ыңғайлы болуы тиіс. Мұндағы дәмханаға табыс түсіп жатыр, бірақ соны жаңартуға, ішін әдемілеуге болады ғой. Коньки киетін жердегі орындықтарды сырлап қоюға әрі кетсе екі келі бояу кетеді. Сосын стадион прожекторларын көбейту керек, жарық аздау, – деді облыс әкімі Даниал АХМЕТОВ.
Осы жерде стадион басшылығы облыс әкіміне 232 миллион теңге тұратын стадионды жаңғырту жобасын таныстырды. Аймақ басшысы аталмыш жобамен жіті танысып шығып, оған қаржы қарастыруға уәде етті.

Ержан Әбіш