Еліне еңбегі сіңген елеулі жан еді
Берікхан Тайжігіт
Ғадыл Ибраев жайлы жазу, оның жүріп өткен жолына үңілу оңай емес болды, өйткені ол кісінің жасаған ізгілікті істері, еліне, қазаққа деген махаббаты ұшан-теңіз еді.
Ұйымдастырушылық қабілеті тым жоғары, артынан із қалдыра білген Ғадыл Ибраев 1928 жылы Абыралы өңірінде Уәлиолла молданың отбасында дүниеге келіп, саналы ғұмырын ауыл шаруашылығына арнаған. Қайнар ауылынан теріскей батысқа қарай орналасқан Киікқашқан елді мекенінде дүниеге келген оның әкесі Уәлиолла молда сол жерде мешіт салып, мектеп үйін тұрғызған адам болды.
Бірақ Ғадыл ағамыздың кейінгі өміріне бұл да әсер етті. «Бай-құлақтың» баласы болғандықтан, «Бай мен молданы қойдай қу қамшымен…» атты кер заманның кесірі оған да тиді. 1937 жылдың зобалаңында Ғадыл Уәлиолла да жаппай жазалаудан құтыла алмады…
Алайда тірі адам тіршілігін жасайды. Ғадыл Ибраевтың Аягөз өңіріне сіңірген еңбегі орасан. Семейдің малдәрігерлік институтын ойдағыдай тәмамдаған жас жігіт ауыл шаруашылығы саласында бір кісідей еңбек етті. Алдымен Көкпекті ауданында мал дәрігері, совхоз директоры қызметтерін ойдағыдай атқарған білімді де табанды жасты Семей облыстық атқару комитеті Аягөз өңіріне жібереді. Мұнда ол бірер жыл Аягөз аудандық өндірістік басқармасының бастығы болған соң бірден Қарақол асыл тұқымды қой совхозына директор етіп тағайындалады.
– Сол тұста ауыл ерекше өркендеп, дамыды, – дейді Қарақол ауылының көнекөз қариялары. – Елді мекеннің күнбатысына аумағы атшаптырым үлкен алма бағы салынды. Алма бақ деген атауы ғана. Оның ішінде не жоқ дейсің… Алма, алмұрт, өрік, жүзімнің неше түрі. Ортасында қауын-қарбыз… Бүгінде айтуға жеңіл. Ал жотаға Қарақол өзенінің суын бұрып әкелу үлкен еңбек пен қажырлықты талап еткені рас. Бақшаның өнімін Аягөз, Қарақол, Таскескен, Шолпан, Шыңғожа, Ақшәулі (ол тұста КПСС XXV съезі атындағы совхоз), тіпті оңтүстіктегі Үшаралдан да келіп, автокөліктермен әкетіп жатты.
Ғадыл ағамыз шын мәнісінде халықтың ыстық ықыласы мен ақжарма алғысына бөленді. Бұл Ғадыл Ибраевтың бір шаруашылыққа жасаған еңбегінің бір пұшпағы ғана. Ол қандай басшылықта болмасын өзінің ізденімпаздығымен, төңірегіне үлгі боларлық асыл қасиеттерімен дараланып тұрды. Соңында қалған елі ол кісінің осындай ізденімпаздығы мен еңбекқорлық қасиеттерін жоғары бағалады. Үкімет те ол кісінің ауыл шаруашылығын дамытудағы ерен еңбегін елеп, «Ленин», «Еңбек Қызыл ту», «Құрмет белгісі» ордендерімен, көптеген медальдармен марапаттады. Қарақол ауылдық, Аягөз аудандық, Семей облыстық кеңестеріне мүше болып, елдің мұңын ашық айта білген жан ретінде жұртқа танымал болды.
Жұбайы Фарида Хикматуллақызы екеуі екі ұл, бір қыз тәрбиелеп өсірді. Балалары да, немерелері де – қоғамнан өз орындарын тапқан білімді азаматтар. Ғазиз, Қайрат, Жанаттардан тараған ұрпақтар әкенің арманын жалғап, ананың асыл қасиетін сабақтастырып келеді. Текті жерден шыққан ұрпақтары ата-ана қадірін, халқының қадірін білетін асыл азаматтар болды.
Ғадыл аға кейін Алматы облысының Жамбыл, Талғар аудандарында да басшылық орындарда жемісті қызмет етті. Мыңбаев атындағы шаруашылықта да қызмет жасаған ағамыз жайлы өзі қызмет еткен өңір түгел ыстық ықыластарын білдіріп, қимастықпен еске алады. Бар болғаны 56 жыл ғұмыр кешкен Ғадыл Уәлиоллаұлы Ибраев – артында өшпес із қалдыра білген жан.
Аягөз ауданы.
