Депутат қалай әлемді мойындатты?
Бәрекелді! Абу-Дабиде өткен әлемдік «Abu-Dhabi Grand Slam-2017» турнирінде облыстық мәслихаттың депутаты, семейлік Айдос Серікқалиұлы алтын және күміс медальдарды иеленді.
Бас бапкер Арманжан Рузахунов және Бразилиядан аттай қалап алдыртқан қара белбеу иегері Антонио Мартинстің жетекшілігімен сайысқа түскен спортшы жарыстың алғашқы күнінде-ақ, грэпплингтен (күрес түрлерінің тәсілдері бар жекпе-жектің түрі) күміс жүлдеге қол жеткізді.
Бұл қуанышты хабарды бөлісіп, мына жақта бір-бірімізден сүйінші сұрасып жатқанда, жерлесіміз тағы бір жүлдені қанжығасына байлап үлгерді. Жүлде болғанда қандай, алтын медаль! Турнирдің екінші күнінде бразилиялық джиу-джитсудан +100 келі салмақта сынға түскен ол барлық қарсыласын ұтып, бірінші орынды жеңіп алды.
Айта кетейік, жалпы жүлде қоры 155 мың АҚШ долларын құраған бәсекеге әлемнің 52 елінен 1135 жекпе-жек шебері қатысқан.
Сонымен, Айдос Серікқалиұлының қоржынында қазір бақандай үш жүлде: екі алтын, бір күміс медаль болды. Алғашқы алтын жүлдені спортшы Алматы қаласында өткен «Arlan Grip Selection Final-2016» чемпионатында иеленген.
«Халық қалаулысы» деген құрметті мандатпен қатар спортты да абыроймен алып жүрген Айдосты туған қаласы – Семейде кейінгі жастар үлгі тұтады. Сондай-ақ, оның бизнестегі жетістіктерінің өзі бір төбе.
Қуан Сейіт
