«Бірлік» медалімен марапатталды

Осы жыл біздің елімізде Қазақстан халқы Ассамблеясының жылы болып жарияланды. Сонымен қатар, Ұлы Жеңістің 70 жылдығы және Конституцияның 20 жылдығы атап өтілмек. Осыған орай Ассамблея өкілдеріне үлкен міндеттер жүктелуде. Облыстық Достық үйінде аймақ басшысы Даниал АХМЕТОВТІҢ қатысуымен өткен этномәдени бірлестіктер жетекшілерінің, Қазақстан халқы Ассамблеясы мүшелерінің, ғылыми-сараптамалық топтың кездесуінде биылға арналған жоспарлар және өткен жылдың қорытындысы туралы әңгіме өрбіді.
Шығыс Қазақстан облысы Қазақстан халқы Ассамблеясы хатшылығының меңгерушісі Еркінбек Аязбаев өткен жылғы жұмыстардың нәтижесі туралы айтып берді. Ол Шығыс Қазақстанда өзге елдер өкілдерімен мәдени байланыстар күшейіп, Қытай, Моңғолия және Ресейдің этномәдени бірлестіктерімен шекаралық ынтымақтастық дамып келетінін, сонымен қатар «Алтай – біздің ортақ үйіміз» акциясы аясында өзара ықпалдастық белсенді жүріп жатқанын мәлім етті. Қалалық және аудандық достық үйлерінің, этномәдени бірлестіктердің қызметі де ерекше атап өтілді.
– Ассамблея хатшылығы барлық белсенділерге Отанымыздағы бейбітшілік пен өзара түсіністікті сақтау мақсатында атқарған қоғамдық жұмыстар үшін алғыс білдіреді. Ассамблея жылы мейрамға, еліміздегі бейбітшілік пен келісімнің салтанатына айналуы тиіс, – деді Еркінбек Аязбаев.
Шығыс Қазақстан облысы Қазақстан халқы Ассамблеясы ғылыми-сараптамалық тобының төрайымы Люция Абдуллина өзінің баяндамасында елдегі тыныштықты сақтауда ең бастысы ақпараттық тәуекелдерге әрекет ету екенін атап көрсетті, себебі электронды бұқаралық ақпарат құралдары арқылы бөгде идеологиялық ағымдар таратылады. Әзірше бұл Қазақстанға көп қатысты емес, ол барлық бірлестіктердің үйлесімді жұмысымен түсіндіріледі.
Еліміздің дамуындағы Ассамблея рөлін бағаламау мүмкін емес. Өйткені, Қазақстан халықаралық сарапшылардың «бұл ел ұлтаралық алауыздық салдарынан ыдырайды» деген болжамдарына қарамастан үлкен жетістіктерге қол жеткізе алды. Мемлекетіміздің табысы халықтың бірлігіне, барлық ұлттық тілдер мен дәстүрлерге деген құрметке негізделген. Ассамблея жұмысының арқасында сенімнің, келісім мен өзара түсіністіктің ерекше ауаны қалыптасты, әрбір азамат ұлтына немесе діни нанымына қарамай Ата заңда кепілдік берілген құқықтар мен еркіндіктердің бәрін толық пайданаланды.
Елбасымыз Нұрсұлтан НАЗАРБАЕВ өз Жолдауында: «Этносаралық келісім – ол өміршеңдік оттегі. Біз дем алған кезде оны байқамаймыз, ол өздігінен болады – біз тек өмір сүреміз. Бірлігіміз бен этносаралық келісімді біздің өзіміз сақтауға тиіспіз. Оны біз үшін ешкім ешқашан сырттан келіп жасамайды. Біздің жастарымыз жаңа, тәуелсіз елде өсіп келеді. Бүгінгі буын 90-шы жылдардағы этносаралық соғыстар мен қақтығыстарды, күйреуді көрген жоқ. Сондықтан көпшілігі Қазақстандағы тұрақтылық пен қолайлы өмірді туғаннан солай болуға тиіс сияқты қабылдайды» деп атап айтқан-ды.
– Елдегі бейбітшілікті сақтаудағы маңызды рөл бірыңғай ұлтаралық саясатты жүргізуге арналған барлық ұлттарды біріктіретін биліктің бірегей органына жүктелген, ол – Қазақстан халқының Ассамблеясы. Оның жұмысының табысты болуына көбінесе өңіріміздегі ғалымдар жүргізген зерттеулердің де көмегі бар, – деп атап көрсетті облыс әкімі, Шығыс Қазақстан облысы Қазақстан халқы Ассамблеясының төрағасы Даниал АХМЕТОВ.
– Дарынды ғалымдарымыздың еңбегі елдің дамуында маңызды рөл атқарды және оның жетістігіне айналды. Олар – көптеген республикалық құжаттардың негізіне айналған нақты ұсыныстар. Қуантарлығы, біздің ғылыми сараптамалық тобымыз тек Шығыс өңірімен ғана шектелмейді. Топ 14 халықаралық ғылыми-тәжірибелік конференция өткізіп, оларға әлемнің көптеген елдерінен ғалымдар қатысты. Біздің әзірлемелер әлемдік ғылым үшін үлкен қызығушылық туғызады және Еуропа мен Американың біраз кітапханаларында сақтаулы, – деді тарих және қоғамдық ғылымдар академиясының академигі, Д.Серікбаев атындағы ШҚМТУ философия және саясаттану кафедрасының профессоры Лилия Столярова.
Қазақстанда барша этностардың мәдениетін, тілін, дәстүрін дамытуға қажет жағдайлардың бәрі жасалған. Ассамблея қызметінің арқасында мемлекетіміздің этносаралық қарым-қатынастарды тиімді шешетін ел ретіндегі халықаралық беделі артып келеді.
– Қырғызстандағы және Украинадағы бауырлас халықтардың қақтығысы тұрақсыздықтың елге қандай зардап тигізетінін көрсетті. Украина кеңестік кезеңде экономикалық дамудың жарқын үлгісі болатын. Бірақ қазір келіспеушіліктер елді тіл принципі бойынша екіге бөліп отыр. Бізде Украинадағыдай зор әлеует жоқ, оның кеме жасау өндірісі дамыған, еуропалық елдерге тіке шыға алады. Алайда, бізде Елбасының жүргізіп отырған салиқалы саясаты бар. Бүгінде еліміздің ішкі жалпы өнімі Украинадағыдан жоғары, халық саны бізде үш есе аз болғанның өзінде. Мұның бәріне ұлтаралық тұрақтылықтың арқасында қол жеткізіп отырмыз. Қаншама мектеп, аурухана, жолдар салынды, әлі де салынады. Дәл осындай тиімді саясатты бұдан әрі де жалғастыра берсек, өңірлер осы қарқынмен дами бермек. Жерімізде тұрып жатқан барлық халықтардың тілдері мен әдет-ғұрыптарына құрметпен қарау керек және осы игі дәстүрді ұрпақтан-ұрпаққа жалғастыруға тиіспіз. Біз – еуропалықтар емеспіз, еуразиялықтармыз. Біздің өз бет-бейнеміз бар, өзіміздің діліміз, тарихи негізіміз бар және біз осымен мақтанамыз! – деді облыс әкімі Даниал АХМЕТОВ.
Кездесуге қатысушылар өз тілектері мен ұсыныстарын ортаға салды, оның ішінде этномәдени бірлестіктерге арналған үлкен ғимарат – Достық сарайын салу қажеттігі айтылды. Аймақ басшысы барлық мәселелерді қарастырып шығуға уәде етті.
Жиын соңында Достық үйінің белсенділері, атап айтсақ, Қазақстан халқы Ассамблеясының мүшесі Владимир Акулов пен Қазақстан халқы Ассамблеясы депутаттық тобының мүшесі, Бесқарағай аудандық мәслихатының депутаты Вячеслав Харченко «Бірлік» атты қоғамдық алтын медальмен марапатталды.

Ержан Әбіш