Бір шаңырақ астында ғұмыр кешіп келеміз

Кеше Өскемендегі этноауылда «Бір шаңырақ астында» атты облыстық достық форумы болып өтті. Форум жұмысына аймақ басшысы Даниал АХМЕТОВ қатысып, Шығыс Қазақстанда ұлтаралық және конфессияаралық достықты нығайтуда еңбек сіңірген азаматтарды арнайы сыйлықтармен марапаттады.
Келе жатқан 1 мамыр – Қазақстан халқының бірлігі мерекесі қарсаңында облыс орталығындағы көрікті орындардың бірі саналатын этноауылда, ашық аспан астында өткен аталмыш шараға облысымыздағы этномәдени бірлестіктер мен Достық үйлерінің өкілдері, ардагерлер мен жастар қатысып, форумның мерекелік рәуіште өтуіне өз үлестерін қосты. Осы сан алуан ұлт пен ұлыстың өкілдерінен құралған қауымды бұл жерге бірлік пен этносаралық татулық атты қастерлі ұғымдардың тоғыстырғаны ақиқат.
Елбасы Нұрсұлтан НАЗАРБАЕВ таяуда ғана өткен Қазақстан халқы Ассамблеясының 20 жылдығына арналған мерейтойлық сессиясында «Ассамблея тарихы – біздің тұрақтылығымыздың тарихы. Біз осыны әр кезде есімізде сақтап, осы құндылығымызды қызғыштай қорып, мәпелеуіміз, қадірлеуіміз керек. Бұл халық зердесі үшін, адамдардың достығы мен өзара түсіністігі үшін, балаларымыз бен немерелеріміздің болашағы үшін ең басты мәселе» деген болатын.
Иә, форумда айтылғандай, бүгінде Қазақстан халқы Ассамблеясы – бейбітшілік пен келісімнің, елімізде тұрып жатқан барлық ұлттар мен ұлыстар достығының мықты іргетасы іспетті. Ассамблея қазақстандықтар үшін бірлік, төзімділік, патриотизм және еңбексүйгіштік сезімдерін қалыптастыратын еліміздегі ең белді де беделді институттардың біріне айналды. Мұны шараға қатысушылар да бірауыздан растап отыр.
Форумның ашылуында жиналған қауым назарына сахна төрінде орын тепкен үлкен экраннан «Бір Отан, бір тағдыр, бір жер» деп аталатын бейнеролик ұсынылды. Бұдан кейін көрермендер облысымызда тұрып жатқан ондаған этностың тілінде сөз сөйлеген жастардың сәлемдесуін тыңдап, артынша аспанға бейбітшілік символы саналатын ақ көгершіндердің ұшырылуын тамашалады. Дәл осы кезде сахна төрінде «Жігер» ансамблі жігіттерінің киелі қара домбырасынан күй төгіліп жатты. Осындай салтанатты сипатта өткен форумның ең есте қалар сәті облыс әкімінің сыйлықтарын табыстау рәсімі болды. Аймақ басшысы Даниал АХМЕТОВ өңірдегі Достық үйлерін ұлттық шығармашылықты, мәдениетті дамытуға, қоғамда этносаралық келісім мен тұрақтылықты нығайтуға қосқан үлестері үшін арнайы тағайындалған сыйлықтармен марапаттап, жұмыстарына алдағы уақытта да табыс пен сәттілік тіледі.
Форум барысында «Злато», «Вайнах», «Свиточ», «Инвейдерс» және «Алау» сияқты облысымызға танымал өнер ұжымдары сахна төріне шығып, көрерменнің ыстық ықыласына бөленді.
Естеріңізге салайық, облыс халқының кіші Ассамблеясы бүгінде 105 этностан, 103 ұлттық мәдени орталықтан және тоғыз Достық үйінен тұрады. Аймақта ұлтаралық келісім мен бейбітшілікті нығайту ісі табысты жүзеге асырылуда. Республика бойынша бірінші Достық үйі біздің облысымызда ашылған болатын. Сондай-ақ, «Бейбітшілік пен келісімнің жол картасы» мега-жобасы мен «Достық керуені» акциясы да кезінде біздің облыстан бастау алған-ды. Бүгінде облыс мақтанышына айналған этноауыл Қазақстан аумағында баламасы жоқ бірегей кешен болып табылады.

Нұржан Кенжеұлы