«БОМБА ҚОЙЫЛДЫ» ДЕГЕН БАЛА ҰСТАЛДЫ

8 қараша күні  Өскемендегі  алты бірдей мектепке жарылғыш зат қойылды деген ақпарат тараған болатын.  Мектептерге бомба қойылғаны туралы жалған хабарламаны кім жібергені белгілі болды.

Ағымдағы жылдың 8 қарашасында Өскемен қалалық білім беру бөлімінің электронды мекенжайына қаланың алты  мектебіне жарылғыш зат қойылғаны туралы хабарлама түскен. Бұл мектептерде тексеріс жүргізіліп, ақпараттың жалған екені анықталған. Қылмыстық іс те қозғалып, іле-шала ол жалған ақпаратты таратушы да белгілі болды.

15 қарашада жедел-іздестіру іс-шаралары барысында ПД э        кстремизмге қарсы іс-қимыл басқармасының қызметкерлері ұлттық қауіпсіздік органдарымен бірлесе отырып, жалған хабарлама берген қала мектептерінің бірінің 9-сынып оқушысы екенін анықтап, ұстады. Оқушы мектептегі тестілеуге дайын болмағандықтан, осындай әрекетке барған.

Ішкі істер министрлігі терроризм актісі туралы көрінеу жалған хабарлама үшін 5 мың айлық есептік көрсеткіш мөлшерінде айыппұл (15,4 млн теңге) не болмаса осы мөлшерде түзету жұмысына, сондай-ақ бес жылға дейінгі мерзімге бас бостандығынан шектеу немесе айыру жазасына тарту көзделгенін ескертеді.

Жыл басынан бері елімізде осындай факті бойынша 140 қылмыстық іс қозғалған. Қылмыс жасағандары үшін 36 адам ұсталса, олардың 17-сіне қатысты сот әртүрлі жаза тағайындаған. Осындай іс-әрекеттерді кәмелетке толмағандар жасаса, шығындарды өтеу олардың ата-аналарына немесе заңды өкілдеріне жүктеледі.

 Жамал Ермен