Биыл «Оң қолды» оқимыз
Жыл сайын өтіп келе жатқан «Бір ел – бір кітап» республикалық кітап оқу акциясы дәстүрлі үрдіске айналды. Акция Ұлттық академиялық кітапхана және Кітапханашылар ассоциациясы бастамасымен 2007 жылдан бері өтуде. Бұл бастаманы еліміздің түкпір-түкпіріндегі кітапханалар қолдап, оқырман мен кітаптың арасына дәнекер болып келеді.
Осымен он жетінші рет ұйымдастырылып отырған акция оқырмандар арасында кеңінен танымал. Акция көптеген шығармалар мен оқырманды табыстырып, руханиятты насихаттауға үлес қосып келеді. Акцияның мақсаты – ұлттық әдебиетіміздегі үздік туындыларды насихаттау, жастарға рухани-адамгершілік және патриоттық тәрбие беру. Сонымен қатар акция қоғамның отандық әдебиетке, оның ішінде классикаға деген қызығушылығын әрі қарай арттыруға мүмкіндік туғызады.
– Өз басым «Бір ел – бір кітап» акциясы бойынша таңдалған туындылардың көбін оқып келемін. Акцияның арқасында бұрын оқымай жүрген бірқанша кітапты оқып, кейбір авторлардың шығармашылығымен таныстым. Өткен жылы Ахмет Байтұрсынұлының рухани мұрасымен сусындадық. Биыл енді Төлен Әбдіктің шығармаларын «Оң қолдан» бастап оқимыз. Бұл шығарманы бұрын оқығанмын, бірақ қайталап оқып шығуға мүмкіндік туып отыр. Кей шығарманы қайталап оқыған жақсы, – дейді қала тұрғыны, кітапхана оқырманы Аманкелді Нысанов.
Иә, биыл танымал қаламгер Төлен Әбдіктің шығармашылығы «Бір ел – бір кітап» акциясы аясында оқырман қауымға ұсынылып отыр. Жазушының қаламынан оқырманын ойға жетелейтін көптеген шығармалар туды. Қаламгер – «Көкжиек» (1969), «Күзгі жапырақтар» (1971), «Ақиқат» (1974), «Айтылмаған ақиқат» (1980), «Оң қол» (2002) әңгімелер мен повестер жинақтарының, «Өлара» (1985), «Ақшоқыда қыс қатты» (1987) романдарының авторы.
«Біз үшеу едік» атты қойылымы ел театрларында үздіксіз сахналанып келеді. Кинодраматургия саласына да атсалысып, «Қыз Бәтіш пен Ерсейіт» повесі бойынша «Өтелмеген парыз», «Белгісіз ұлдың тағдыры» атты көркем фильмдердің сценарийін дайындаған. Шығармалары бірнеше шет тіліне аударылып, «Истина» атты кітабы орыс тілінде екі рет басылып шықты. Т.Әбдіков «Эллада ерлері» грек аңызын (1977) қазақшаға аударған.
Осы жылы оқырман қауым «Оң қолдан» бастап қаламгердің түгелдей шығармасын оқып шығары сөзсіз.
Алтай Ғали-Асқар
