Бейбіт митингке қатысты

Президенттікке Жалпыұлттық социал-демократиялық партиясынан үміткер Нұрлан Әуесбаев тығыз құрылысқа қарсы бейбіт митингке қатысты.

Астанадағы саябақтардың бірінде өткен митингте үміткер тығыз құрылыс барлық қалалардың мәселесі екенін айтты. Оның пікірінше, құрылыс салушыларға әкімдіктер бас жоспар бойынша мектеп, балабақша, ауруханалар салынуы тиіс жерлерді береді. Салдарынан тұрғындар әлеуметтік инфрақұрылымның жоқтығынан зардап шегеді. Жағдайды барлық деңгейдегі әкімдерді тікелей сайлау арқылы өзгертуге болады. Митинг қорытындысында қарар қабылданды. Құжат тұрғын үйлермен қатар балабақша, мектеп, аурухана, саябақтардың құрылысын жүргізуді, үйлер сапасын арттыруды міндеттейді.

Алматыдағы ЖСДП белсенділері үміткерді қолдау мақсатында «Салауатты өмір салтын ұстану және табиғатты сақтау үшін!» акциясын өткізді. Табиғат аясында жаттығып, «Медеу» мұз айдынына көтерілді.

Сондай-ақ кандидат Орал қаласының активімен кездесіп, сайлауалды бағдарламасын баяндады.

Нұрлан Әуесбаев сайлауалды үгіт-насихаттың аралық нәтижелерін тікелей эфирде баяндады.