Бауырсақ пісірудің ондаған түрін біледі
«Бауырсақ апа» – ел арасында 74 жастағы Кәмшат Әбділденованы халық осылай атайды. Себебі, әже бауырсақ дайындаудың ондаған түрін біледі.
Ол бауырсақты 18 жасынан бастап пісіріп, мерекелерде туыстары мен достарын тәтті-дәмдімен қуантады. Наурыз мейрамы сынды мерекелік шараларда да бауырсақ дайындайды. Айта кетейік, Кәмшат апа төрт бала, сегіз немере және алты шөбере тәрбиелеп отырған ардақты әже.
– Мен тұрмыс құрған 18 жасымнан бастап бауырсақ пісіре бастадым. Қазір бауырсақтың ондаған жасалу жолын білемін. Әдетте мен ашытқы қосылған бауырсақтарды дайындаймын. Жалпы оның ашытқы қосылған, жұмыртқа қосылған және басқа да көптеген түрлері бар. Сондай-ақ шелпек те пісіреміз. Бүгінде маған шөберелерім көмектесіп, көп уақытты менімен ас бөлмесінде өткізеді. Балаларым мен немерелерімнің ұлттық құндылықтарымызды сыйлап, дәстүрімізге қызығушылық танытқандарына дән ризамын, – дейді Кәмшат Әбділденова.
Қазір бауырсақтың кез келген түрін ғаламтордан қарап-ақ дайындауға болады. Алайда бұрынғы кезде әркім тамақ түрін аналарынан үйренген. Кәмшат апа да анасынан тәжірибе алып, енді өз шеберлігін жас ұрпаққа сіңіруде.
– Біздің кезімізде ғаламтор болған жоқ. Біз тамақ дайындауды әжелеріміз бен аналарымыздан үйрендік. Бала кезімнен анам жұмыртқа қосылған бауырсақ дайындауды үйретті. Інімізді әскерге шығарып салғанда біз бауырсақ пісіріп беретінбіз. Жұмыртқа қосылғандықтан бұл бауырсақ ұзақ жолда да бұзылмай сақталып тұрады, – дейді Кәмшат апа.
Бауырсақ пісіруден бөлек Кәмшат апа «Айша бибі» қазақ мәдени орталығының мүшесі бола отырып, қолөнермен де айналысады.
– Міне, мен 19 жыл бойы «Айша бибі» қазақ мәдени орталығының мүшесі болып келемін. Онда біз қолөнермен, ән айтумен айналысып, ансамбльге қатысып, бауырсақты да пісіреміз. 35 жыл бойы мен тері зауытында жұмыс істеп, тон тіккен едім. Сол еңбегім міне, бүгінде жалғасын тауып, орталықта қолөнермен де айналысамын. Облыс пен қала тұрғындарын Наурыз мейрамымен құттықтаймын. Баршаңызға денсаулық пен бақыт тілеймін, – деп қорытындылады сөзін Кәмшат Әбділденова.
Флора Левина
