Руханият

Бауырластар зиратынан Барқытбелге бір уыс топырақ жеткізілді

Бауырластар зиратынан Барқытбелге бір уыс топырақ жеткізілді

Айтбай ауылына даңқты балуан Дәулет Тұрлыхановтың анасы Мәрзия Айтбайқызы екінші дүниежүзілік соғыс кезінде қаза тапқан өзінің туған ағасы Ақан (Рахметолла) Айтбайұлы Тоқбаевтың топырағын әкеліп, жерлеу рәсімін өткізді.
Бұл шараға аудан жұртшылығы, марқұмның туған-туыстары, алыс-жақыннан келген қонақтар қатысты.
Бір айта кетерлігі, бұл ауылда Мәрзия ананың әкесі Айтбай ұстаздың ізі қалған, сондықтан да елді мекен сол кісінің атымен аталады. Тұрлыхановтар әулеті 2007 жылы осында Айтбай мешітін тұрғызған болатын.
Мәрзия Айтбайқызы Украинаның Хмельницкий облысы, Судилко деревнясындағы бауырластар зиратынан жеткен топырақты Айтбай мешітінің имамы Нұржан бауырымызға тебірене табыстады.
– Ұлы Отан соғысының аяқталғанына 70 жыл өтсе де, оның дүмпуі әлі де санамызда жаңғырып, оқтын-оқтын хабар беріп тұратыны рас. Менің туған ағам Ақан Тоқбаев 1942 жылы соғысқа аттанып, небәрі 25 жасында майдан даласында опат болды. Ұзақ жылдардан бері Ақан ағамыздың не тірі, не өлі екенінен бейхабар болып жүрген едік. Ресейден, Беларуссиядан іздеп, ақыры осы Украинаның Судилко деген деревнясындағы бауырластар зиратынан тапқанбыз. Ондағы арнайы ескерткіш-тақтада кәдімгідей оның аты-жөні, туған және қаза тапқан жылдары көрсетілген екен. Сол топырақты осында жатқан әкеміз Айтбайдың жанына қоюды ұйғардық, – деді Мәрзия Айтбайқызы.
Үржар ауданының әкімі Серік Зайнулдин жиналғандарды өңірімізде атқарылып жатқан іргелі істерден хабардар ете келіп: – Қадірлі Мәрзия Айтбайқызы, сіз ұлағатты ұстаз, ардақты анасыз, тәрбиелеп өсірген балаларыңыз елдің атпал азаматтары бола білді. Елбасының сарабдал саясатының арқасында еліміз үлкен жетістіктерге жетсе, оған сіз секілді саналы ұрпақ тәрбиелеп өсіріп отырған абзал аналардың да үлесі зор. Өздеріңізге мәлім, елімізде соғыс өрті шарпымаған бірде бір отбасы болмады. Бүгін соған тағы бір мәрте көз жеткізіп отырмыз. Марқұм Ақан ағамыздың жаны жәннатта болсын, – деді.
Облыстық ішкі саясат басқармасының басшысы Ербол Нұрғалиев та үстіміздегі жылдың дүбірлі даталарға толы екендігін, бірнеше күндерден соң Ұлы Жеңіс мерекесінің 70 жылдығын тойлайтынымызды, жуырда ғана Елбасы Нұрсұлтан НАЗАРБАЕВТЫҢ халықтың үлкен қолдауымен қайта сайланғанын атап көрсетті. Елдің экономикасы мен әл-ауқатының артуы адал еңбекте ғана екенін айтқан облыстық ауыл шаруашылығы басқармасының басшысы Дүйсенбай Селиханов Тұрлыханов пен Тоқбаев әулеттеріне туыстарының бауырластар зиратынан табылғандығының өзі көңілге медеу екендігін айтса, Ақан ағаның туыстары атынан аягөздік Әлібек Балтабекұлы, ауылдастары атынан Жұман Сүгіржанов ақсақал өз тілегін білдірді. Ал үржарлық ақын Серікбек Туғановтың арнау өлеңі ешкімді де бей-жай қалдырмағаны рас.
Орталық мешіттің имамы Нұрзат Қасымұлы Украинадан жеткен құтыдағы топырақты Айтбай ақсақалдың жанына жерлеу рәсімін өткізіп, туған-туыстары мен жиналған қауым топырақ салып, рәсімге алыстан келген Қайрат, Дулат, Талғат, Қуат, Гүлнар, Марат, Қанат Тұрлыхановтар мен Тоқбаевтар әулеті қатысты.
Сол күні түс ауа Айтбай ауылында Ұлы Отан соғысының ардагерлеріне арналған ескерткіш ашылып, Мәрзия Айтбайқызы ауылдағы тыл ардагерлеріне сый-сияпат таратып, мектеп ішінен ашылған балабақша мен ұстаздар қауымына бір-бір теледидар тарту етсе, облыстық ішкі саясат басқармасының басшысы Ербол Нұрғалиев өткен жылы ғана ашылған мектеп ұжымына ноутбук сыйлады. Ел азаматтары да қарап қалмай, келген қонақтардың иықтарына шапан жапты. Жиылған көпшілікке Нағима Есқалиева, Медеу Арынбаев сынды өнер жұлдыздары шағын концерт қойып, шара соңынан дастарқан жайылып, марқұмның рухына бағышталып құран оқылды.

Берікхан Тайжігіт
Үржар ауданы.

Осы айдарда

Back to top button