Басталған құрылыс мерзімінде аяқталуы тиіс

Аймақ басшысы аппараттық кеңес өткізіп, алдағы мерекелік іс-шараларға, сүт қабылдау пункеттерін ұйымдастыруға және де спорттық нысандар құрылысына қатысты бірқатар хаттамалық тапсырма берді. Мұнымен қоса, Даниал АХМЕТОВ бір айда екінші рет Өскеменнің 19-шы тұрғын ықшамауданында салынып жатқан мың орындық мектепте болды.
Жиында облыс әкімінің орынбасарлары және аппарат жетекшісі аймақ басшысына өздеріне жүктелген тапсырмалар жөнінде есеп берді. Өз кезегінде Даниал АХМЕТОВ Дүйсенғазы Мусинге суармалы телімдердің түпкі пайдаланушыларына түбегейлі талдау жүргізуді, сонымен қатар, тұрғындардан сүт қабылдау бекеттерін ұйымдастыру бойынша жұмысты жалғастыруды міндеттеді. Мамыр мерекелеріне – Қазақстан халқының Бірлігі күніне, Отан қорғаушылар күніне және Ұлы Жеңістің 70 жылдығына дайындықты ерекше бақылауға алған жөн. Мұндай тапсырманы аймақ басшысы өзінің орынбасары Жақсылық Омарға жүктеді.
Мұнымен қоса, аппараттық кеңесте облыс әкімі мұз айдындары бар денешынықтыру-спорт кешендерінің құрылысы бойынша ұсыныстар енгізу қажет екенін атап өтті. Бұл ретте, бірінші кезекте Шығыс Қазақстанның ірі спорттық ғимараттары жоқ аудандарын қарастыру керектігі айтылды.
Облыс орталығының 19-шы ықшамауданда салынып жатқан мектеп ғимаратында өткен жедел кеңесте облыс әкімі оқу ордасы бірінші тамызға дейін пайдалануға берілуі, ал мемлекеттік комиссияның актісіне 25 шілдеден кешіктірілмей қол қойылуы тиіс екенін қатаң ескертті. Кестеден кешігуге жол бермеу үшін жұмысшылар санын екі еседен артық көбейту керек.
Облыс әкімі Даниал АХМЕТОВ нысанға жасаған өткен бір сапарында бар мердігер – «Ақмола құрылыс материалдары» серіктестігінің басшылығына бірқатар тапсырма жүктеген болатын. Осыған байланысты құрылыс компаниясының мамандары атқарылатын жұмыстардың кестесін құрыпты. Дегенмен, аталмыш құжатқа облыс әкімінің көңілі толмады, өйткені, онда құрылыс жұмыстарына жұмылдырылған адамдардың саны туралы мәлімет жоқ болып шықты.
– Өндіріс жоспарының маған қажеті шамалы. Еңбек сыйымдылығына байланысты жұмысқа тартылатын адамдар санын есептеп шығу қажет, – деп түсіндірді аймақ басшысы.
«Ақмола құрылыс материалдары» ЖШС директорының орынбасары Қайролла Ыдырысов бүгінгі таңда мектеп құрылысына 237 адамның тартылғанын, алдағы уақытта олардың санын үш жүзге дейін көбейту жоспарланғанын айтты. Бұған қоса, екінші ауысымда 50 жұмысшы еңбек ететін болады. Десек те, белгіленген мерзімге дейін үлгеру үшін нысанда шамамен алты жүз адам жұмыс істеуі тиіс, олай болмаған жағдайда, аймақ басшысы атап өткендей, құрылыс дер кезінде бітпей қалуы әбден мүмкін.
– Мердігерлер мектептерді 1 қыркүйекте пайдалануға беретін жағдайлар жиі кездеседі, нәтижесінде балалар сабаққа тек 1 қазаннан бастап кірісіп жатады, – деді облыс әкімі. – Мұнда олай болмауы тиіс. Бірінші тамызға дейін нысан тапсырылуы қажет. Жұмысшылар санын көбейткендеріңіз үшін рақмет, алайда, өздеріңіз де жақсы түсініп тұрған боларсыздар, мұнда атқарылатын шаруа бастан асады, ал жұмыс күші жеткіліксіз. Мұнша құрылысшымен жұмысты үш айдың ішінде аяқтап үлгермейсіздер. Тұрғын үйлерді пайдалануға беру негізінен екінші жартыжылдыққа белгіленген, сондықтан сол нысандардағы жұмысшыларды осы жерге тартыңыздар. Бір аптадан кейін сіздерден құрылысқа жұмылдырылған адамдардың саны есепке алынған нақты жоспарды күтемін. Бір миллиард теңгеден астам қаржыны игеру керек, ал бұл аз қаражат емес.
Сонымен қатар, аймақ басшысы Даниал АХМЕТОВ сапасыз құрылыстарға жол бермеу керектігін атап өтті.
– Глубокое ауданының Зимовье ауылындағы мүгедектерге арналған медициналық-әлеуметтік мекемені қараңыздаршы. Бұл деген масқара ғой. Мұндағы канализация мен өрт қауіпсіздік жүйелері жұмыс істемейді. Адамдар қандай жағдайда өмір сүріп жатқаны түсініксіз. Ал егер оқыс жағдай орын алса не болады? Мұндай бассыздық қайталанбауы тиіс. Мемлекеттік комиссия және өзге де қадағалаушы органдар салынып және пайдалануға беріліп жатқан нысандарды барынша түбегейлі бақылауы қажет, – деп қадап айтты облыс әкімі.
Аймақ басшысын таңғалдырған тағы бір жағымсыз жаңалық Ольга Рыпакова атындағы Жеңіл атлетика манежін пайдалануға қабылдау туралы мемлекеттік комиссия актісіне әлі күнге дейін қол қойылмауы болды. Осыған қарамастан, ғимарат бір жылдай қолданылып, онда балалар шұғылданып келеді. Мұнымен қоса, қазір нысанда шешімін күтетін бірқатар мәселе туындаған. Соның негізгісі – манеж төбесінен су сорғалап тұр. Осыған байланысты облыс әкімі Даниал АХМЕТОВ өзінің орынбасары Димитрий Гариковке және құзырлы мекемелер басшыларына облыстағы барлық спорттық нысанды мемлекеттік қабылдау комиссиясы актісінің бар-жоғына қатысты тексеріп шығуды міндеттеді.
– Мұндай жұмыс қорқыныш туғызады, – деп өзінің наразылығын білдірді облыс әкімі. – Мұны тіпті, қылмыс деуге болады. Осындай салғырттыққа, маңызды құжаттардың жоқтығына қарамастан, спорттық нысандарда балаларымыз айналысып жүр, ал әлеуметтік мекемелерде мүгедектер мен зейнеткерлер тұрып жатыр.
Жедел кеңес барысында қан орталығына аппаратура жеткізу мәселесі де сөз болды. Облыстық құрылыс басқармасының басшысы Юрий Шматко қазір нысанға барлық құрал-жабдықтың 90 пайызы жеткізілгенін мәлім етті.
Билік өкілдері басын ашқан тағы бір мәселе – бірдей нысандар құнының негізсіз ұлғаюы болды. Айталық, Өскемендегі хоккей модулін салуға 370 миллион теңге жұмсалса, Зыряндағы дәл осындай нысанның жобалық құны 750 миллион теңгені құрауда. Аймақ басшысы Даниал АХМЕТОВ орын алған жағдайларды түбегейлі зерделеу бойынша тиісті тапсырмалар жүктеді.

Шығыс-Ақпарат