Баспана сыйға тартты
Үржар балаларға арналған арнайы әлеуметтік қызмет көрсету орталығының «Жас өркен» тобының қызмет алушысы, орталықтың түлегі Анир Нұрдәулетов кәмелеттік жасқа толып, өзінің атына берілген баспанаға отбасымен қоныс аударды.
Орталығымыздың басшысы С.Селиханова, әлеуметтік істер жөніндегі орынбасары Р.Жанкүшікова бастаған бірқатар маман Анирды туған күнімен құттықтап, қуанышына ортақтасып, сый-сияпат көрсетіп қайтты.
Қайырымдылық – мұқтаж жандарға көрсетілер нақты көмек, ізгіліктің анық көрінісі, адамның асыл қасиеті. Қайырымдылық жасап, қолдау көрсету – қазақтың қанында ежелден бар қасиет. Мұқтаж жандарға жақсылық істеуді асыл дініміз деп білеміз. Баспаналы болуға демеушілік көрсеткен Үржар ауданының тұрғыны, жерлесіміз Ақбаева Гүлзира ханым өзінің екі бөлмелі пәтерін үйге мұқтаж болып жүрген жас отбасыға тарту етті. «Жақсының жақсылығын айт, нұры тасысын» дегендей, жақсы іске мұрындық болған Гүлзира ханымға айтар алғысымыз шексіз. Нұрдәулетовтер отбасы Анирдың туған күні қарсаңында жаңа пәтерге қоныстанып, тосынсый жасап қуантты.
Анасы ұлының өтініші бойынша, пәтерге интернет желісін тарту қажет екенін өтінді. Мекеме басшысы С.Селиханова жуықта интернет жүйесімен қамтамасыз ететініне уәде берді. Қуанышына ортақтасып келген басшыларға, орталық қызметкерлеріне Назгүл Қалиақбарқызы шынайы көңілмен аналық алғысын білдірді.
И.Нысамбаева,
орталық маманы, Үржар ауданы
