Барқытбелде үй берілді

Берікхан Тайжігіт

Барқытбел ауылында бір сауабы мол, қуанышты жағдай орын алды. Ауылдағы Сұлтанғазы мен Қарлығаш Доғалақовтар жанұясына жас кәсіпкер Асхат Абылбаев баспана сатып алып берді.

Асхат Қалиханұлы – осы Барқытбел ауылында туып-өскен, осы жерден мектеп бітірген азамат. Біршама жылдардан бері бизнеспен айналысып келе жатқан ол жағдайы келіп жатса, жерлестеріне қайырымдылық жасап келе жатқаны шындық.

– Мен үшін өзім туып-өскен ауылымның азаматтарының орны бөлек, – дейді Асхат Абылбаев. – Мен үшін олардың әлеуметтік жағдайларының жақсы, өмірлерінің шат-шадыман болуы  маңызды. Осындай игі істердің басы-қасында жүретін аудан басшысы Нұржан Тоқсейітовке айтар алғысым шексіз.

Иә, шын мәнінде, жеті бала тәрбиелеп, өсіріп отырған отбасы үшін бұл зор қуаныш болды. Іс-шараға аудан әкімі Нұржан Тоқсейітов қатысып, үй иелеріне баспананың заңды құжаттарын тапсырды. Сондай-ақ жиылған жұрттың алдында сөз сөйлеп, кәсіпкер Асхат Қалиханұлының иығына шапан жауып, Доғалақовтар отбасына сый-сияпат ұсынды.

Үржар ауданы.