БАРҚЫТБЕЛДІҢ БАУРАЙЫНДА БАС ҚОСТЫ

 Еліміздің әр қиырында және шетте жүрген қандас бауырларымыз Барқытбел баурайында бас қосты. Өйткені мұнда «Қазақстаным – жалғыз Отаным» атты II қандастар форумының шымылдығы түрілген. Бұл салтанатты жиын Дүниежүзі қазақтары алғашқы құрылтайының өткеніне 30 жыл толуына орай ұйымдастырылды.

Тәуелсіздік күні мерекесі қарсаңында Үржар аудандық мәдениет және тілдерді дамыту бөлімінің басшысы Жанат Андасованың тікелей басшылығымен іске асырылған форумға кешегі келмеске кеткен Кеңес өкіметінің солақай саясатының кесірінен дүниенің түкпір-түкпіріне тарыдай шашылып, кейін атажұрттарына (соның ішінде Үржар ауданының ауылдарына) қоныс аударған қандастарымыз жиылды. Олардың ішінде ұлтымыздың өнері мен руханиятына, мәдениеті мен білім-ғылымына үлес қосып жүрген, сол сияқты әртүрлі кәсіппен айналысып, еліміздің өсіп-өркендеуіне септігін тигізіп жүрген бауырларымыз баршылық. Аудан орталығындағы Мәдениет үйінің залы адамға лық толды.

Форумға қатысушы жерлес қандастарды айтулы мерекемен құттықтаған аудан әкімінің орынбасары Әлия Сарбаева ақжарма тілегін арнай келе жиылған көпшілікке мықты денсаулық, еңбектеріне жеміс, отбасыларына бақ-береке тіледі. Еліміздің тыныштығы, жеріміздің тұтастығы, мемлекетіміздің дербестігі бәрінен қымбат құндылық екенін ерекше екпін түсіре айтты.

Еңбегімен ел құрметіне бөленгендер

Халықаралық және республикалық жыр мүшәйраларының бірнеше дүркін жеңімпазы, «Шуақты Шығыс» қоғамдық қорының төрағасы, Қазақстанның «Алтын кітабының» алтын медаль иегері Қайрат Кәмейұлына аудандық мәслихаттың шешімімен «Үржар ауданының Құрметті азаматы» атағын аудан әкімінің орынбасары Әлия Сарбаева мен аудандық қоғамдық кеңес төрағасы Мұратқан Жүнісов салтанатпен табыстап, басына оқалы бөрік кигізіп, иығына оюлы шапан жапты.

«Еңбегі бағаланғанның бағы зор» демекші, Дүниежүзі қазақтарының алғашқы құрылтайының 30 жылдығына орай ауданымыздың әр салада еселі еңбек етіп жүрген қандастарымызға Үржар ауданы әкімінің грамотасы зор қошаметпен табысталды. Марапат иелерінің арасында республикаға танымал белгілі әнші, облыстық «Шұғыла» ән байқауы мен «Арай» фестивалінің, Бұхар жырау атындағы байқаудың жеңімпазы, осы форумға арнайы келген қонақ Алмас Қанатұлы, аудан экономикасының дамуына үлес қосып жүрген кәсіпкерлер: Сержан Шәкен, Ерсінгүл Були, Қанат Сәли, Мұрат Дәукенұлы, Қалибек Қабдраш, Төлеуғайша Пәшкенқызы және Беделхан Байжұмаұлы, көкөзектік ақын, жыршы Бәделхан Кәп, М.Әуезов атындағы орта мектептің ұстазы Ерсін Нұрсадық, ақжарлық атбегі Шапиян Ханият, құсбегіліктен Қазақстанның спорт шебері, көктеректік Қайдар Нуман, республикалық,  халықаралық байқаулардың жеңімпаздары, «Сонар» ансамбілінің әншілері Ержас Төлеухан мен Шапағат Қуантай, ауданға танымал жезтаңдай әншілер: Ерғазы Тұрсын, Толқын Әлеш, Күлманат Құмар және Қайрат Ахмет, аудандық аурухананың терапевт дәрігері Сердіхан Нүрипа, Науалы амбулаториясының дәрігері Ергүл Қайратқызы, Көкөзек фельдшерлік пунктінің акушері Мәкен Нұржана және халыққа қызмет көрсетуші үржарлық Гүлбақыт Қайсанқызы мен Шұғыла Ибрашқызы бар екенін мақтанышпен айтамыз.

Ал аудан әкімі Нұржан Тоқсейітовтің Алғыс хатымен қандастар форумын ұйымдастыруға белсене қатысқан Арайгүл Мұратбекқызы, Гүлнұрхан Тілеуханқызы, Бақтыгүл Шаяхметқызы, Әзікей Білдіханқызы, пластиктен есік, терезе жасап, ауылға демеушілік көрсететін бестеректік кәсіпкер Дәлелхан Ерсін, көкөзектік ұстаз, ақын Қабыш Мажит, қарабұталық Нұрқұсман Кенжебек, мақаншылық Қайролла Нығымет, Дүйсен Сайламхан, Төлеген Мәдениет, қабанбайлық Дәулет Есхат, ақжарлық Есімхан Нұрзат пен Жақсылық Аллаберген, Көлденең орта мектебінің мұғалімі Қаулан Құсманұлы, Барқытбел орта мектебінің мұғалімі Сабыр Ерсін, елтайлық Еркін Ануарбек, қарабұталық Қамұқай Рымхан, көктеректік Айтқұрман Мырзабек, жоғарғыегінсулық Байырхан Қанат пен Саят Қарқын, науалылық Шаяхымет Беделхан мен Солтан Аманжол, егінсулық Зейнелхан Жақсарат, келдімұраттық Мақсұтқан Тілеухан және қоңыршәулілік Сыдық Ләззат марапатталды.

Көрме мен концерт

Ауданымызда қандастар форумы осымен екінші жыл қатарынан өткізіліп отыр. Осы шараға қолдау көрсетіп, өткізуге үнемі ынталы ықылас танытып отыратын аудан әкімі Нұржан Тоқсейітовке, сондай-ақ аудандық мәдениет және тілдерді дамыту бөлімі мен ауылдық округ әкімдіктеріне қандастар атынан «Шуақты Шығыс» қоғамдық қорының төрағасы, ақын Қайрат Кәмейұлы және «Шығыс Алтай» бүркітшілер федерациясының президенті, елімізге танымал бүркітші, Үржар ауданының Құрметті азаматы Тәттімбет Кәпұлы ақжарма алғысын жеткізе отырып, мерекелік жыр-шашуын арнады.

Форумды ұйымдастыру алқасы жиналған жұртқа төгілтіп бата берген Науалы ауылының қариясына халқымыздың ата-салтымен оқалы бөрік кигізіп, иығына оюлы шапан жапты.

Осынау айтулы шараның аясында қандастардың тіл үйірер ұлттық тағамдары мен ұлттық нақыштағы тоқыма бұйымдары қойылған керемет көрме болды. Көрме жеңімпаздарына Жанат Заманбекқызы аудан әкімінің Алғыс хатын табыстап, соңы көңіл өсірер мерекелік концертке ұласты. 

Амангелді Заманбекұлы

Үржар ауданы.