Бала ауырса «шұғыл көмек» қызметіне жүгіну керек
Әлеуметтік желілерде тұрғындар облыстық Ана мен бала орталығы қабылдау бөлімшесінің жұмысына шағымданған. Жуырда денсаулық сақтау басқармасының басшысы Гүлмира Сағидуллина аталған мекемеде болып, орталықтың қабылдау бөлімшесінің жұмысымен және жоғары сырқаттану маусымына дайындықпен танысты.
Бүгінде медициналық мекеменің қабылдау бөлімшесінде балғындарға лор, офтальмолог, хирург, нейрохирург, жақ-бет хирургы қатарлы дәрігерлер қызмет көрсетеді. Түнде 11 маманнан тұратын бригада жұмыс істейді. Тәулігіне қабылдау бөлімшесі арқылы орта есеппен алғанда шамамен 180-300 адам өтеді. Бір айда орташа есеппен 3500-3700 кішкентай пациентті қабылдайды. Осы жылдың тоғыз айында Ана мен бала орталығының қабылдау бөлімшесі арқылы 36 мыңға жуық адам өткен.
– Негізінен балалар тұмау, ЖРВИ, жөтел және құлақ ауруы белгілерімен келеді. Олардың 50%-ы өз бетімен келген. Кейбір ата-аналарға мұрны бітеліп тұрған, бірақ дене қызуы 37,5 градустан аспаған бала ауруханаға жатқызуды қажет етпейтінін түсіндіру қиын. Мұндай пациенттерді емханалар өздері қарау керек. Дәл осындай қарбалас жағдай өткен демалыс және мереке күндері байқалды. Тәулігіне 200-ге жуық бала түсті. Олардың 18-20%-ы ғана ауруханаға жатқызылып, қалғаны амбулаториялық емделуге үйіне жіберілді, – деді облыстық Ана мен бала орталығы қабылдау-диагностикалық бөлімшесінің меңгерушісі Айнұр Жакимбаева.
Қазір бөлімшеде балалар бронхит, пневмония, асқынған ЖРВИ сияқты респираторлық аурулармен жатыр. Ана мен бала орталығының бас дәрігері Жайық Жұмахановтың айтуынша, бұл мәселені шешу үшін бөлімшеде қосымша орындар ашылуда.
Басқарма басшысы орталықты аралап жүріп қабылдау және фильтр бөлімшелерінде болған балалардың аналарымен сөйлесті. Облыс орталығының бір тұрғыны басқарма басшысына баласының температурасы үш тәулік бойы көтерілгенін, бірақ тұрғылықты жері бойынша емханаға жүгінбегенін айтты.
– Іс жүзінде орталық дәрігерлері қабылдау бөлімшесі мен фильтрде көбінде емхана дәрігерінің функцияларын орындайды. Науқастарға алғашқы уақытқа ұсынымдар беріледі, сондай-ақ тұрғылықты жері бойынша медициналық-санитарлық алғашқы көмек (МСАК) қызметіндегі педиатрға жүгінуге нұсқау беріледі, – дейді Жайық Жұмаханов.
Орталықтың фильтр бөлімшесінің жұмысына келетін болсақ, бұл жерде тәулігіне қызуы көтерілген 80-110 балаға дейін қызмет көрсетіледі. Сондай-ақ келушілерге ыңғайлы болу үшін мұнда фильтр дәлізін кеңейту мәселесі қарастырылып жатыр.
– Ата-аналар МСАК-те балаларға сағат 8.00-ден 20.00-ге дейін қызмет көрсетілетінін және емханаларда «шұғыл көмек» қызметі жұмыс істейтінін есте ұстағаны жөн. Сондықтан жедел жәрдемге қоңырау шалмас бұрын ауруханаға жатқызу көрсеткіштерінің жоқтығына көз жеткізіп, емхананың «шұғыл көмек» қызметіне жүгіну қажет, – деп атап өтті Гүлмира Сағиддулина.
Сондай-ақ ол орталық басшылығына фильтр жұмысын қайта қарауды, науқастардың ағынын бөлуді, пациенттерді қолдау қызметін күшейтуді тапсырды. Ондағы мамандар тікелей қабылдау бөлімшесінде болып, пациенттермен жұмыс істеуі және олардың сұрақтарына жауап беруі керек. Басқарма басшысы сонымен қатар емхана қызметінің науқастарды сұрыптау жұмысын ширата түсу туралы тапсырма берді.
Кәмал Естай
