Бағаны негізсіз көтерген дәріханаларға шағымдар түсіп жатыр

Сыбайлас жемқорлыққа қарсы қызмет мамандары да облыстық прокуратура, тауарлар мен көрсетілетін қызметтердің сапасын бақылау департаменті, «Шығыс-адалдық алаңы» жобалық кеңсесі, Арнайы мониторингтік топ және ақпараттық-насихаттау штабы өкілдерімен бірге дәріханаларды аралап, дәрі-дәрмек мөлшері мен олардың бағасына күнделікті мониторинг жүргізуде.

— Мақсат — дәрі-дәрмек тапшылығын жою және медицина препараттарының құнын негізсіз өсіруге жол бермеу. Мұндай шара аудандарда да қолға алынды. Мамандар күнделікті дәріханаларды тексеріп, тұрғындардың ұсыныс-тілектерін назарға алады. Күрмеулі мәселелер құзырлы органдарға жолданады, — дейді департамент маманы.

Тексеруші топ күніне 10-ға жуық нысанға барып, талаптардың сақталуы мен ем-дом препараттар қорын тексереді. Топ мүшелерінің айтуынша, заң бойынша дәріханалардың дәрі-дәрмектің бағасын рұқсат етілген бағадан жоғары қоюға құқығы жоқ болса да, бірқатар дәріханаға тұрғындардың шағымдары түскен. Сонымен қатар, дәрі-дәрмек сатып алу кезінде чек берілмейтіндігі де айтылған.

Жұмысшы топ қаладағы бір дәріханада кейде чек берсе, кейде бермейтіндігіне көз жеткізіп, қызметкерлеріне түсіндіру жүргізді. Сондай-ақ, рейд барысында тұрғындарды жалған жарнамаларға алданып қалмауға, тек дәріханалардан, медицина қызметкерінің рецепті бойынша алуға шақырды.

— Шекті бағаны кез келген азамат андроид желісінде «dariKZ» мобильді қосымшасын жүктеу арқылы бөлшек саудада сатылатын немесе босатылатын дәрілік заттардың шекті бағасын бақылауға мүмкіндігі бар. Егер баға шекті сомадан асып кетсе, түбіртегін алып, заң аясында арыздануға болады. Жалпы, қажетті препараттар мен жеке қорғаныс заттары қаладағы барлық дәріханаларда сатылымда бар. Сонымен қатар, қалалық медициналық мекемелер қажетті дәрі-дәрмектермен қамтамасыз етілген, — дейді маман.

Айта кетейік, жоғарыда көрсетілген мәселелер бойынша аудио, бейне жазбаларыңыз бен ұсыныс, шағымдарыңызды 8702 000 24 94 және 8775 306 78 50 WhatsApp нөмірлеріне дәріхана атауын көрсете отырып жолдай аласыздар.

Жасын Қалибек