«Азия Авто» экономикалық одақ нарығына еркін шығуы тиіс

Кеше облыс әкімі Даниал АХМЕТОВ «Азия Авто» акционерлік қоғамының жұмысымен, Өскемен қаласын абаттандыру жобаларымен танысты.

Тоғыз айда 100 мыңдық межені бағындырды

«Азия Авто» кәсіпорны Еуразиялық экономикалық одақ кеңістігінде машина жасау ісінің ірі ойыншысына айналуы тиіс. Алдағы уақытта кәсіпорын алдына осындай міндет қойылмақ. Аймақ басшысы кәсіпорынның осы міндет үдесінен шығуға толық мүмкіндігі бар екенін атады. Әуелі мұндағы машина құрастыру технологияларымен танысқан аймақ басшысы ресейлік «Автоваз» ААҚ-мен бірлесе салынып жатқан жаңа зауыттың құрылыс барысына қанықты.
«Бипек Авто»-«Азия Авто» компаниялар тобы директорлар кеңесінің төрағасы Анатолий Балушкин зауыт бірнеше лицензиялық стандарттармен жұмыс істейтіндіктен әр үлгідегі көлік үшін түрлі технологиялар қолданылатынын баяндады. Кәсіпорын 2013 жылы 86,8 мың дана көлік өндірсе, өткен жылдың қыркүйек айында-ақ 100 мыңыншы көлікті құрастырған.
Бүгінде Қазақстанның машина құрастыру және сату нарығындағы үлесі 53,3 пайызға жетіп отыр. Өткен жылдың өзінде ғана «Бипек Авто» компаниясы автомат қорапты Renault Duster көлігін, AVANT әмбебап арнайы техникаларын, KIA Soul көлігінің 2014-2015 жылғы үлгілерін, Renault Logan, ЉKODA Rapid Spaceback маркалы машиналардың жаңа топтамаларын сатылымға шығарды. Осылайша компания 32 түрлі көлік моделін сәтті саудалап отыр.
Сондай-ақ, өткен жылы компанияның қызмет көрсету және көлік сату офистерінің саны 34-ке жетіп, еліміздің 27 қаласын қамтыған. Олардың арасында Бейнеу, Жаңаөзен, Хромтау сынды өндірістік шаһарлар да бар.

Тасымалдау ісінде түйткілдер бар

Бүгінде «Бипек Авто» ЖШС-нің тек қана көлік саудасы бойынша облыстағы үлесі 73 пайызға, республикадағы үлесі 64 пайызға жетіп отыр.
-Біз бір жылдың ішінде 1200 жаңа жұмыс орнын ашып, облыс бюджетінің 14 пайызына тең салық түсірдік. Бізді толғантып отырған мәселе – көлік тасымалдау логистикасын жолға қою. Әзірге оны карнайы жүк көліктерінің көмегімен шешіп келеміз. Бірақ олар үш жылдан кейін ұзақ жолға жарамсыз болып қалады. Ал арнайы вагондардың жарамдылық мерзімі 30 жылға дейін барады. Сондықтан көліктерді теміржол арқылы тасымалдау ісін мемлекет қолдауы арқылы ретке келтіру қажет, – дейді А.Балушкин.
«Азия Авто Қазақстан» АҚ бас директоры Ержан Мәндиев те Согра кентінде салынып жатқан жаңа зауыт іске қосылған кезде шығарылған көлікті тасымалдау қиындығы туындайтынын айтады. Бұл мәселені «Қазақстан Темір Жолы» ұлттық компаниясы арқылы шешудің тетіктері қарастырылуда. Қымбат көліктер тасымалдайтын арнайы вагондарды ұсынушылар арасында ресейлік «Алтайвагон» ААҚ ең тиімді баға ұсынып отырса керек. Олар сыйымдылығы 8-12 көлікке жететін арнайы вагонның бір данасын 110 мың АҚШ долларына бағалаған. Облыс әкімі бұдан арзан жолдарын ойластыру керектігін ескертті.
Анатолий Балушкин өткен жылдан бері сатылымға шыққан финляндиялық AVANT маркалы шағын тракторлары 40 адамды алмастыра алатынын айтады. Сондай-ақ, былтырдан бастап мото-шана және мото-қайық сынды белсенді демалыс техникалары да саудаға қойылған.
Ал жаңадан салынып жатқан толық циклді зауыттың құрылысына чехиялық компаниямен қатар жергілікті «Казгипроцветмет» компаниясы тартылған. Бүгінде зауыттың орны құнарлы топырақтан толықтай аршылып, свайлар қағылуда. Аталмыш өндіріс ошағы жылына 120 мың автокөлік шығаруға мүмкіндік беретіндіктен, Ресейдің «Автоваз» ААҚ Челябі, Том, Омбы, Кемерово, Барнаул қалаларының нарығын жабуды өскемендік компанияға тапсырып отыр. «Азия Авто Өскемен» деген атау қойылған жаңа кешеннің жалпы ауқымы 25 мың шаршы метр болмақ. Оның 15 мың шаршы метрін жұмысшылардың баспанасы мен қосымша инфрақұрылым алады. Бизнестің әлеуметтік жауапкершілігі аясында атқарылған шаруаларға да тоқталған Анатолий Балушкин кентте ашылған балабақшада түнгі топтар да жұмыс істейтінін, мұндай режимнің түнгі кезекте жұмыс істейтін ата-аналарға өте қолайлы екенін жеткізді. Компания қызметкерлерінің орта жасы 35-ті құраса, орташа еңбекақы көлемі 140 мың теңге көлемінде.
Облыс басшысы аталмыш кәсіпорынға облыс әкімдігі тарапынан қолдау жалғасатынын қадап айтты.
-Шамамен 550 млн. АҚШ долларына тең инвестициялық жобаның бізге берері мол. Біріншіден, қосымша 12 мың жұмыс орны ашылады. Екіншіден, машина жасау саласы өзімен бірге бүкіл экономиканы алға сүйрейді. Машина өндірісі пайда болған жерде шағын кәсіпорындар, цехтар пайда болады. Өңделген ағаш пен металға, электр құрылғыларға тапсырыс артады. Осының арқасында шағын және орта бизнес дамиды. Оның үстіне бұл Еуразиялық экономикалық одақ аймағында құрылып отырған алғашқы өндірістің бірі. Сондықтан Үкіметтік деңгейде қолдау көрсету үшін барлық жағдайды жасаймыз. Барлық жобалау институттарын құрылысқа қажет инфрақұрылым тарту бойынша қолдау көрсетуге жұмылдырамыз. Осы инвестициялық жобаның арқасында «Азия Авто» кәсіпорны Еуразиялық экономикалық одақ кеңістігіндегі ірі машина жасаушы компанияға айналуы тиіс, – деді облыс әкімі Даниал АХМЕТОВ.

Орталық алаң абаттандырылмақ

Бұдан кейін аймақ басшысы облыс орталығын абаттандыру жобаларымен танысты. Республика алаңы, Гагарин желекжолы мен Славский атындағы жағалаудың болашақ келбетін келісті ету үшін мамандар Мәскеуге арнайы барып, түрлі нұсқаларды зерттеп қайтса керек.
Республика алаңында қосымша екі субұрқақ орнатылып, аспашамдар ауыстырылмақ. Аймақ басшысы алаңға төселетін материалдардың сапасына баса мән беру керектігін, оны ұсынушы мердігерлер кемінде бес жылдық кепілдеме беру керектігін ескертті. Ал Славский атындағы жағалаудың ені сегіз метрге кеңейетін болды. Соның есебінен жазда велосипедшілер жолы, ал қыста шаңғышылар жолы ашылмақ. Олардың ұзақтығы – екі жарым шақырым. Сондай-ақ, жағалаудың бес жерінен өзенге түсе берістер салынып, қоршалады. Мұнда да аспашамдар ауыстырылып, жаңа дизайндағы орындықтар қойылмақ.
Ал Гагарин желекжолының Карбышев көшесімен түйіскен тұсында балалар алаңқайы бой көтереді. Алаңқайға төселетін тақталар берік әрі иілмелі материалдан жасалатынын айтқан қала әкімі Темірбек Қасымжанов мұндай төсеніштер бөбектерді жарақаттан сақтайтынын жеткізді.
Ал Ертіс көпірін кеңейту арқылы Сәтпаев, Қазақстан, Жеңіс даңғылдарындағы көлік ағынын азайту жобасын қайта қарастыру тапсырылды. Қала басшылығы ұсынған жоба тек Пермитин көшесі мен Славский жағалауы арқылы өтетін көліктер санын азайтатынын айтқан облыс басшысы жобаны жетілдіре түсуге кеңес берді.

Есімжан Нақтыбайұлы