«Қазцинк Торпедо» қайта түлейтін күн алыс емес

«Қазцинк Торпедо» хоккей клубы қайта түлейтін күн алыс емес. Кейінгі жылдары басынан бағы тая бастаған клубтың бұрынғы даңқын қайтару үшін облыс әкімі Даниал АХМЕТОВ қажетті жағдайдың барлығы жасалатынын айтты. Білікті бапкерлер, спорттық-жаттығу базасы, материалдық-техникалық қамтамасыз ету – бәрі, бәрі болады.
Аймақ басшысының төрағалығымен өткен жиында бірінші кезекте қолға алынатын екі бірдей міндет аталды, ол – Өскеменде жоғары хоккей лигасында лайықты өнер көрсететін мықты команда құру және өңірде балалар-жасөспірімдер хоккейін дамыту.
– «Барлық жақсылықтар балаларға» деген ұстаным үдесінен шығуымыз керек. Ең үздік спорт алаңдары, оның ішінде хоккей мұз айдындары жас ұрпақтың игілігіне жұмыс істеуі тиіс. Ал облыстың ересек тұрғындарынан алдын ала кешірім сұрап, күндізгі уақытта барлық спорт алаңдары тек балаларға арналатынын айтқан жөн. Себебі, жастар – біздің болашақ чемпиондар, – деп түсіндірді облыс әкімі.
Жаттықтырушы Сергей Немчиновтың ақпаратына сүйенсек, қазіргі уақытта облыста үш команда жасақталу үстінде. Оның бірі жоғары хоккей лигасында біздің өңірдің намысын қорғаса, екіншісі жастардың хоккей лигасында өнер көрсетпек. Ал үшінші команда ел чемпионатында сынға түседі.
– Біз алдымызға биік мақсат қойып отырмыз, – деп атап көрсетті Сергей Немчинов. – Жоғары нәтижеге жету үшін бапкерлер арнайы оқуларда оқып, көшпелі семинарларға қатысады, белгілі спортшылардың шеберлік-сыныптарынан өтеді. Бүгінде команданың әкімшілік штабы құрылды, 1 мамырдан кейін келіссөздер жүргізілетін хоккейшілер де белгілі.
Ал енді балалар-жасөспірімдер хоккейіне келсек, бұл бағытта жақсы стратегиялық жоспарлар құрылған. Барлық жаттығулар мен сабақтардың кестесі жазылған. Өткен маусымның сәтсіз болуына қарамастан, осы маусымда балаларды қабылдау мөлшері артты.
Балғын мұз айдын шеберлері биыл Беларуське жаттығу жиындарына барады, одан соң Ресейдің Пермь және Тюмень қалаларында екі турнирге қатысады.
Аймақ басшысының айтуынша, биыл Риддер мен Зырян қалаларындағы екі хоккей модулінің құрылысы аяқталмақ. Ал келесі жылы тағы бір осындай спорттық нысан Аягөз қаласында бой көтереді. Мұның сыртында Өскеменде жаңартылған, Оңтүстік Кореяда өндірілген қазіргі заманға сай ең озық құрал-жабдықтарымен қамтылған денешынықтыру диспансері есігін айқара ашады.
– Қазір бапкерлер штабы құрылуда. Қажетті мамандармен келіссөздер жүргізіліп жатыр. Әрине, мықты команданың сапына өскемендік хоккейшілер енеді, – деген «Қазцинк Торпедо» клубының бас бапкері Алексей Фетисов бұдан былай командада қорғаушыларды, шабуылшыларды, қақпашыларды жеке-жеке дайындайтын бапкерлер болатынын жеткізді.
Жиын барысында облыс басшысы спортшылар қатаң тәртіпте оқу-жаттығу шараларын өткізетін заманауи спорттық база құру жобасын іске асыру жағын ойластыруды ескертті. Өйткені, маусым барысында хоккейшілердің жаттығуға өздері тұратын пәтерлерден келіп дайындалуы дұрыс емес. Бұл мәселені шешу жолдары өскемендік клубтың бас демеушісі «Қазцинк» ЖШС басшылығымен бірлесе отырып талқыланбақ.
Айта кетуіміз керек, аталмыш кәсіпорын бірнеше жылдан бері бизнестің әлеуметтік жауапкершілігі аясында бұл спорт түрінің дамуына айтарлықтай үлесін қосып келеді.
Спортшыларға медициналық қызмет көрсету мәселесі де назардан тыс қалмады. Облыстық денешынықтыру және спорт басқармасының басшысы Елдос Чикеновтің айтуынша, бұл орайда медицина ғылымдарының кандидаты, білікті маманмен келіссөз жүргізіліпті. Дәрігер маман өзінің келісімін беріпті.
Сондай-ақ, тағы бір көңіл аударатын жәйт, өскемендік команданың бұрынғы «Торпедо» атауы қайтарылатын болды. Мұның өзі жақсы ырым деп отыр мамандар. Себебі, дәл осы атау арқылы біздің спортшыларды бүкіл посткеңестік мемлекеттер танып, бағалаған.
Қорыта айтсақ, кешегі күні атағынан ат үріккен «Қазцинк Торпедоның» атақ-даңқын қайтару үшін барлық жағдай жасалмақ. Жоспар күшті, ынта бар. Балалар-жасөспірімдер хоккейін дамыту бойынша кешенді бағдарлама әзірленген. Ең бастысы, Шығыстың хоккейін шыңға шығаратын болашақ чемпиондардың қатары спорт секцияларында жыл санап артып келеді.

Шығыс-Ақпарат