Аймақтық іріктеу кезеңдері аяқталды

Ағымдағы жылдың 12 маусымында Өскемен қаласында ашылу салтанаты өтетін Қазақ хандығының 550 жылдық мерейтойына орайластырылған XIX халықтық ойындардың аймақтық іріктеу кезеңі аяқталды.
Бір айға созылған және өңіріміздің аудан-қалаларында өткізілген аймақтық іріктеу кезеңдерінде қатысушылар спорттың төрт түрінен: көкпар, футбол, баскетбол, волейболдан «кім мықтыны» анықтады. Айталық, ұлттық ойынымыз көкпардан Зайсан, Тарбағатай, Көкпекті, Шемонайха, Абай, Катонқарағай, Күршім аудандары және Риддер, Курчатов қалаларының командалары өзара күш сынасса, Өскемен қаласы, Үржар, Ұлан, Зырян, Бесқарағай, Бородулиха, Жарма, Глубокое аудандарының көкпаршылары өз іштерінен үздіктерді анықтады.
Облыстық денешынықтыру және спорт бақсармасының хабарлауынша, іріктеу кезеңдерінің бір ерекшелігі әр аймақтан жоғарыда аталған төрт спорт түрінің әрқайсысы бойынша тек үздік деп танылған екі команда ғана Өскеменде өтетін XIX халықтық ойындардың ақтық сынына қатыса алады.
Мамандардың пікірінше, біраз жылдардан бері қарапайым жұртшылықтың қызығушылығына ие болып келе жатқан бұл халықтық ойындарды ұйымдастыру бірінші кезекте өңірдегі бұқаралық спортты дамытуға ықпал етіп, адамдарды спортқа, салауатты өмірге ынталандыра түседі.

Серік Әбілхан