Аягөздіктер өнімімен де, өнерімен де тамсантып қайтты

«Туған ел – алтын бесігім» акциясы аясында кезекті жәрмеңкенің шымылдығын ашқан Аягөз ауданы Өскемен жұртшылығына өнімін арзан бағада ұсынып, өнерімен тамсандырып кетті.

Аягөз ауданы бойынша жәрмеңкеге 22 ауылдық округ атсалысқан көрінеді. Аудан әкімінің орынбасары Сейілбек Абиырұлының айтуынша, жәрмеңкеге 22 бас ірі қара, 120 бас қой мен 10 жылқы еті, 200 литр қымыз, 250 келі құрт, сондай-ақ, сарымай, ірімшік әкелінген.
Жәрмеңкені аралау барысында Аягөз ауданы шаруаларының жомарттығына тәнті болдық. Жылқы, сиыр, қой еттері әдеттегідей келісі 900 теңгеден сатылғанымен, кейбір шаруалар қала тұрғындарына 800 теңгеден де ұсынып жатты.
– Жәрмеңкелерді өткізіп алмауға тырысамын. Себебі, бұл жерде бірқатар өнімдер қала базарынан екі есе арзан бағада сатылады. Аягөз ауданының қымызы керемет екен. Сатушы тіпті бағасын түсіріп литрін 400 теңгеге берді, – дейді қала тұрғыны Медет Оспанов.
Жәрмеңке қызығы қыза түскен шақта аудан өнерпаздары жұртшылыққа өнерін паш етті. Аудан өнерлілерінің кәсіби деңгейі жоғары екені көрініп тұр. Жезтаңдай әншілері мен мың бұралған бишілерінен бөлек, төрт қыздан тұратын «Қобызшылар» тобы қала халқын қобыздың қоңыр үнімен тербетті. Алматыдағы Ж.Елебеков атындағы цирк колледжінің студенті Жұмат Жанмырзаевтың арқан үстіндегі акробатика өнері таңдай қақтырарлықтай болды.
– Нұрбол Жолдаспекұлы ауданымызға әкім болып келгелі өнер саласына үлкен көңіл бөлініп отыр. Аудандағы мәдениет үйіне жөндеу жұмыстары жүргізілді. Алдарыңызда концерт қойған өнерпаздар аудандық «Қозы Көрпеш» халық театрының әртістері. Өнеріміз Өскемен жұртының көңілінен шықты деп ойлаймыз, – дейді концертті ұйымдастырушы, аталмыш театрдың режиссері Мөлдір Жүсіпова.
Кешкісін Өскемендегі «Үлбі» мәдениет үйінде Аягөз ауданының айта жүрер ауқымды концерті өтті. Мәдени шараны облыс әкімінің орынбасары Жақсылық Омар да тамашалады. Концертке осы ауданның тумалары – эстрада жұлдызы Толқын Забирова дәстүрлі әннің дүлдүлі Ерлан Рысқали, Құрманғазы атындағы халық аспаптары оркестрінің дирижері Жанас Бектұров, дәстүрлі әннің дүлдүлі Ерлан Рысқали, Перизат Тұрарова, Ершат Қайырхан, ақын Ақберен Елгезек сынды азаматтар арнайы келіп өнерімен Өскемен жұртына көтеріңкі көңіл күй сыйлады.

Аян Өрібаев