Ауыз толтырып айтарлық біраз шаруа істелді
Жуырда өткен ұлықтау рәсімінде Президентіміз Қасым-Жомарт Кемелұлы Тоқаев бірқатар маңызды міндетті атап өтті. Ол міндеттерді өңірлерде жүзеге асыру үшін бірінші кезекте білікті басшы керек. Ал облыс әкімі Даниал Ахметов сегіз жыл көлемінде өңірімізді басқарып келеді. Осы уақыт аралығында аймақта біраз шаруа атқарылды.
Атап айтсам, облыстың әлеуметтік-экономикалық дамуы қарқын алды. Елдің жағдайын жақсартуға бағытталған маңызды жобалар қабылданып, нақты істер атқарылуда. Жаңа әлеуметтік нысандар, тұрғын үйлер салынды.
Ал анау Бұқтырма су қоймасы арқылы салынып жатқан еліміздегі ең ірі көпірдің құрылысы ше? Сол сияқты көлік инфрақұрылымы жақсарып, жаңа жұмыс орындары ашылды. Тау-кен металлургия өнеркәсібі, агроөнеркәсіп кешіні дамып жатыр.
Бүгінгі күні қала халқының 96%-ы, ауыл жұртының 91%-ы таза ауыз сумен қамтылған. Бұл республикадағы ең үздік көрсеткіштердің бірі.
Жалаңаштанып қалған шекара маңындағы аудандар мен бұрынғы аудан орталықтарын дамытудың кешенді жоспарлары қабылданып, нақты іске асырылуда.
Қысқасы, кейінгі жеті-сегіз жылда өңірімізде көзге көрініп, көңілге түйетін жұмыстар көптеп атқарылды және ол істер облыс әкімі Даниал Кенжетайұлының басшылығымен ары қарай жалғасын табады деп сенеміз.
Лұқбек Тұмашинов,
«Элхон» ЖШС директоры,
облыстық мәслихаттың депутаты
