Ауыл медицинасын қайта жаңғыртады

Азамат Темірбеков

Алтай ауданында ауыл медицинасын қайта жаңғыртуға бағытталған шаралар аясында жер учаскелері бөлініп, жұмыстар бірінші кезекте жүргізілетін елді мекендер белгіленді.

Бұл туралы аймақ басшысы Даниал Ахметовтің төрағалығымен өткен жиында айтылды. Отырыста халықты жайылым жерлермен қамту, елді мекендердегі интернет сапасын жақсарту, кәсіпкерлікті дамытудың ұлттық жобасы аясында жастарды жұмыспен қамту және ауыл медицинасын қайта жаңғырту ұлттық жобасы аясында 36 жер учаскесін бөлу  мәселелері қарастырылды.

Алтай ауданы әкімдігінің хабарлауынша, биыл жыл басынан бері жұмыспен қамтылған жастардың саны 550 адам болған. Атап айтсақ, бос жұмыс орындарына 243 жас жұмысқа орналасса, 31 адам жастар іс-тәжірибесі бойынша еңбекке араласқан. Бұдан бөлек, жастар әлеуметтік жұмыс орындарына, қоғамдық жұмыстарға, «Алғашқы жұмыс орны» жобасы бойынша жұмысқа жіберілген. Қысқа мерзімді курстарда 12 жас біліктілігін шыңдаса, 49 адам «Бастау бизнес» жобасы бойынша кәсіпкерлік негіздеріне оқытылды. Ал жаңа бизнес-идеясын қорғай білген отыз адам өз жобаларын ілгерілетуге гранттар алды.

Жалпы, қазірде аудан бойынша ауыл медицинасын қайта жаңғырту бағытындағы жұмыстар бірінші кезекте жүргізілетін елді мекендер анықталған. Яғни, Северное, Феклистовка ауылдарында медициналық пункттер, Тұрғысын ауылы мен Октябрь кентінде дәрігерлік амбулатория салу көзделген. Бүгінгі күні бұл елді мекендерде құрылыс жүргізуге жер учаскелерін бөлу жұмыстары қолға алынған.