Ақсақалдар бата беріп сайысты

Адамзаттың абзалы, екі дүниенің сардары болған пайғамбарымыз Мұхаммедтің (с.ғ.с) дүниеге келген айы – Мәуліт мерекесі Күршім ауданының Қалжыр ауылында кең ауқымда аталып өтті.
Ауылдағы мешіт пен Мәдениет үйінде өткізілген рухани басқосуға ауданның Теректі, Құйған, Алғабас, Аманат, Боран ауылдарының, іргедегі Зайсан өңірінен мәртебелі қонақтар қатысты. Қазақстан мұсылмандары діни басқармасының төрағасы, Бас мүфти Ержан қажы Малғажыұлы арнайы келді.
Жиналған қауым Алла елшісінің бойындағы асыл қасиеттері жайында баяндалған мазмұнды бейнесюжетті тамашалап, имамдардың салиқалы уағыз-насихатына сусындады…
Көпшілік алдында сөз алған Бас мүфти Ержан қажы Малғажыұлы:
– Бұл мерекеде баршамызға Алла елшісін көбірек танып, өсиеттерін тереңірек түсінуді нәсіп етсін! Бұл мереке адамдар арасындағы мейірімнің, имандылықтың, бауырмалдықтың арта түсуіне бір сеп болғай! Алла тағала елімізге, жерімізге берекетін жаудырып, халқымыздың кеңпейілі мен ізгі ниетіне сай, бірлігімізге сызат түсірмей, жақсылығын нәсіп етсін! – деп ізгі тілегін жеткізді.
Дін өкілдерінің айтуынша, қазіргі заманда Мәуліт көптеген мұсылман елдерінде аталып өтіледі. Бұл дінімізді насихаттаудың, жас ұрпақты имандылыққа, жақсы мінез-құлыққа шақырудың, пайғамбардың теңдессіз тұлғасын паш етудің керемет бір сәті.
«Баталы құл арымас, батасыз құл жарымас» дегендей, айтулы мереке барысында бата беруден сайыс өткізілді. Нәтижесінде Күршім ауылынан келген Есен қажы I орынды иеленсе, қалжырлық Қадыр атамыз II орынды, Теректі ауылынан келген Қожа ата III орынды еншіледі. Сондай-ақ, мейрам күні ауыл ақсақалдарының иықтарына шапан жауып, әжелерге ақ жаулық сыйлады. Сондай-ақ, Қалжыр ауылының бас имамы Айбол Қайсаұлы өзінің шәкірттерін де сый-сияпатсыз қалдырған жоқ.
Тағылымды шарада аудандық ішкі саясат бөлімінің басшысы Арайлым Сейітқазықызы аудан әкімінің құттықтау хатын жеткізді.
– Қарап отырсақ, ата-бабамыздан сақталып келген дәстүрлі ислам діні, пайғамбарымыздың асыл сүннеті, өнегелі өмірі осы уақытқа дейін жалғасып келе жатыр. Біздің ата-бабаларымыз да пайғамбарымызды аса құрметтеген. Әрине, халқымыз Алла елшісінің өмірбаянын жалпылама білгенімен, бұл игі шараны Мәдениет үйінде, бұқара халықпен бірге өткізу, ол кісіні жақыннан тануға, адами қасиеттерін біле түсуге, жалпы ізгілікті насихаттауға септігін тигізеді. Халқымыз асыл дінімізбен сусындай берсін! Еліміз аман болсын, жұртымыз тыныш болсын! Алла тағала асыл дінімізге қуат берсін! – деді Теректі ауылының бас имамы Серікқали Кәкенұлы.

Зарина Тоқтарова

Қалжыр ауылы,
Күршім ауданы