Қариялар бильярд ойнады

Тәуелсіздік мерекесінде бірқатар зейнеткер-еңбек ардагерлері аудандық ардагерлер кеңесінің кеңсесінде бас қосып, бильярдтан жарыс өткізді.
14 адам атсалысып, ұзақты күнге жалғасқан бұл тартысты бәсеке құрметті демалысқа шыққанымен, қатардан қала қоймаған ақсақалдардың қарым-қабілетін ашып көрсетіп, жаңа бір қырынан танытқандай болды. Бұл ойынға икемділіктерін бұрыннан байқатып жүрген күршімдік зейнеткерлерден басқа бұл күні осы сайысқа арнайы келіп қатысқан маралдылық Б.Байтасов пен Қ.Мәметов те өздерінің осал емес екендіктерін дәлелдеп қайтты.
– Мына үлкен бильярдты 2013 жылдың наурызында аудандық ардагерлер кеңесіне аудан әкімі А.Сейітов әдейілеп тарту еткен болатын, – дейді аудандық ардагерлер кеңесінің төрағасы Е.Ақтекенов. – Содан бері осы бір тамаша ойынға атсалысатын адамдардың қатары молайып, басымыз күнделікті қосылып тұратын болды. Тек биылғы жылдың өзінде еңбек ардагерлері арасында алты рет сайыс өткізілді. Бұл жолғы бәсекеге ауданымыздың түлегі, өскемендік белгілі кәсіпкер Жанарбек Білімбаев демеуші болып, 150 мың теңге ақша ұсынып отыр. 9-мамырдағы жарысқа Ержан Сқақов қаражат бөлген еді. Ал «Денсаулық күніне» орай өткізілген жарысты «Нұр Отан» ХДП аудандық филиалы ұйымдастырған болатын. Бұл – өз арамыздағы сайыс қой, ал мұндай жарыстар 2015 жылдан бастап әр тоқсан сайын өтіп тұратын болады, өйткені, осы мәселе спорт бөлімінің жоспарына енгізіліп отыр.
Екі топқа бөлініп алып, кешке дейін күш сынасқан аға буын ойыншыларға төрелік жасаған құрамында Т.Әшіманов, Б.Рахметолдин, Н.Қисамбин бар қазылар алқасы ойынды барынша әділ қорытындылады. Оның нәтижесінде ойынның абсолют шебері болып күршімдік Өмірбек Әлімжанов танылса, 1-топтан 1-орынды В.Петров жеңіп алды. 2-топтың 1-орнына Н.Қисамбин ие болды. Екі 2-орынды Н.Нұғымаров пен Ө.Әлімжанов бөлісіп, екі 3-орыннан Қ.Әбілмәжінов пен Т.Әшіманов бой көрсетті. Жеңімпаздарға алған орындарына байланысты тиісінше 15 мың, 12 мың, 8 мың теңгеден жүлделер табыс етілді.

Хасен Зәкәрия
Күршім ауданы