Қарбызына қарақалпақтар да қызығып отыр

Ауыл маңындағы Тайжүзген өзенінінің бойындағы тоғыз жолдың торабында орналасқан қыстақты иелігіне алып, 3 гектар жерге бау-бақша сала бастағанда, ауылдастарының Юсупке сенімсіздікпен қарағаны рас. Тіпті, кейбір құрдастары «бағбан болып бағыңның жанғанын көрерміз әлі» деп миығынан күлген-ді.
Алғашқы жылы-ақ картоптан мол өнім алған Юсуптың еңбегі жанып, жұрт сеніммен қарай бастады. ағамыз уақыт көшінің алдына шықты. Содан бергі 15 жылдың ішінде бес баласын осы кәсіпке баулып өсірген ол тұңғыш ұлы Мадиярдың есімімен аталатын шаруа қожалығын да ашып алды. Юсуп Жетібаев баптап өсірген көкөністер бүгінде облысқа да белгілі бола бастады.
Қазір қожалық 17 гектар жерге картоп, қызанақ, сәбіз, сарымсақ, қияр еккен. Бақша басында болғанымызда, сайын даланың төсінде жұмыс істеп жатқан ағайындылардың бақшасының ұқыптылығына таңғалдық. Арам шөп атаулыны мүлде көрмейсіз. Шаруашылық соңғы төрт жылда қарбыз бен қауынның көлемін де арттырыпты. Өйткені, өнімге деген сұраныс та молайған.
Бір атап айтарлығы, Юсуптың өнімдері – еш химиялық қоспасы жоқ, экологиялық таза. Сондықтан да болар тоғыз жолдың торабында орналасқан шаруашылық өнімдеріне келімді-кетімді жолаушыны былай қойғанда, биыл Алматы, Астана, Семей қалаларынан да тапсырыстар түсе бастапты. Жыл сайын Зайсан көліне демалушылардың қатарының көбеюі Юсуп ағамыздың да саудасын қыздыруда.
Оның айтысына қарағанда, таяуда ғана ірі тапсырыс түсіпті. Қарақалпақстаннан арнайы келген ала тақиялы ағайындар Юсуптың қауын-қарбызына қызығып, қомақты тапсырыс беріпті. Шаруашылық биыл бір миллион теңге субсидияға ие болған. Юсуп Жетібаев алдағы уақытта жер көлемін ұлғайтуды жоспарлап отыр.
Әрине, шаруашылықта шешімін таппаған мәселе де бар. Ол – су тапшылығы. Маусым айының аяғында аптап ыстықтан Тайжүзген өзені тартылып қалып, су тапшылығы туындаған. Аудан әкімі Д.Оразбаев келер жылы жерасты құдығын тартып беруге уәде беріпті. Мәселе шешіле қалса, кіші су қоймасын салып, болашақта шаруашылық тамшылатып суару жүйесіне көшпек. Егер ойға алған іс жүзеге асса, еңбек өнімділігі үш есе артып, бау-бақшаның көлемі де ұлғаймақ. Тарбағатай өңірінде бақша өнімімен алғаш айналысып, отбасылық бизнеске айналдырған, жасы жетпістен асса да қолына кетпенін ұстап, еңбек етуден шаршамаған Юсуп Жетібаевтың тірлігі көпке үлгі боларлық-ақ.

Қадырбек Кәкімұлы

Тарбағатай ауданы.