Қарауыл гүлзарлы мекенге айналады

Қарауыл гүлзарлы мекенге айналады Абай еліндегі абаттандыру шарасы биыл ерекше қарқынмен басталды. Соңғы екі-үш жылдың көлемінде жаз шыға гүлзарлармен көмкерілетін аудан орталығы енді тіптен құлпыра түспек. Себебі, Қарауылдағы көгалдандыру ісіне тың күш келді.

Аудан әкімінің бастамасымен ауылды абаттандыру бағытындағы «Жасыл ел» жастар жасағының арнайы штабы құрылды. «Жас келсе – іске» демекші, қазірдің өзінде жоспардағы іс жүзеге асырылып, бірқатар игілікті шараның шеті қайырылды.

Жастар жасағы осы ауылда туып-өскен ұл-қыздардан және студент жас-тардан құралған. «Жасылелдіктер» еңбекке мамыр айынан бастап кіріскен болатын. 30 адамнан тұратын алғашқы топ қарқынды жұмыс істеді. Енді екі топқа бөлінген олар кезегімен екі ай бойы өз елді мекендерін гүлдендіруге ат салыспақ. Әрқайсысы 17 мың теңгенің көлемінде жалақы алады екен. Жаз мез-гілінде бос жүрмей, «екі қолға бір күрек» тапқан жасақтың керек-жарағы түгел.

Аудандық жастар орталығының директоры Мейіржан Смағұловтың айтуынша, жастарға спорттық үлгідегі арнайы форма берілген. Осылайша, қарауылдық өрендер қызу еңбек маусымын бастап жіберді. Абаттандырудағы айтулы істің әлқиссасы ауыл кіребері-сіндегі 69 түп көшет отырғызылған жаңа аумақтан басталды. Бұл – жастардың ұлы Жеңістің 69 жылдық мерекесіне тартуы. Жасақ мүшелері сонымен қатар ауылдағы саябақ, скверлермен бірге көше бойларын да гүлдендіру бағытында жұмыс істеуде.

Жастарға нақты қолдау бар. Жағдай жасалған. Ауылдағы «Риза» КҚК жанынан ашылған жылыжайда түрлі-түсті гүлдің 40 мың түп көшеті өсірілген болатын. Жылыжай меңгерушісі Талғат Нұртазин жетекшілік ететін бұл нысанда да өткен айда «жасылелдіктердің» 12 мүшесі еңбек етіпті. Қазір қыс бойы күтімде ұсталып, жақсы өсіп жетілген гүл көшеттері жылыжай жанындағы арнайы жаздық орынға көшірілген. Мұнда жел мен даладағы ауа темпаратурасына бейімделген соң мекемелер маңайына, көшелер бойындағы гүл-зарларға қондырылатын болады. Де-генмен қазіргі күннің өзінде Қарауылдың көз тартар орындары – Жеңіс алаңы мен орталық алаңда көшеттердің алғашқы легі отырғызылды. Жаз мезгілінде айналасын жайнатып, хош иіске бөлейтін петуния, бархатцы, талия, сальвия сынды гүлдер ендігі арада Қарауылды тіптен көрікті ете түспек.

Айта кету керек, ұмытыла бастаған дәстүрлі шаралар да қайта қолға алына бастады. Мәселен, Гүл мерекесін ұйымдастыру қолға алынды. Соңғы екі жыл бойы өткізілген шараға өз ауылдарының көркеюіне үлес қосуды қалаған жергілікті кәсіпкерлер Аян Жарылғапов пен Бақтыгүл Қасымбекова демеушілік жасады. Осылайша, тұрғындардың да әсемдікке деген ынталары арта түсті. Алдағы уақытта бұл байқауды аудандық деңгейде ұйымдастыру көзделуде.
Жері шөлейтті, тастақты өңірді гүлдендіру шарасы осылайша өрісін кеңейтіп, соны серпінге ие болуда. Ең бастысы – ынта да, қолдау да бар.