Қарағайдан үй бұйымдарын жасайды

Күршімдегі «Жаңару» жеке кәсіпкерлігінің иесі Ринат Нарубаев екі жылдан бері қарағайдан есік-терезе жасаумен айналысады. Ағаштан түрлі бұйым жасаудың қыр-сырын үйренген жас жігіт осы кәсіпті 9 жыл бұрын қолға алыпты.

Ринаттың айтуынша, ағаш өңдеп, үй сәнін келтіретін бұйымдар жасау бастапқыда тек қызығушылық тудырыпты. Жеке кәсіпкер ретінде тіркелген соң, аудандық кәсіпкерлік бөлімі арқылы БҰҰ-ның даму бағдарламасы (ПРООН) арқылы 1,5 миллион теңге несие алады. Бұл қаржыға Барнаулдан қондырғылар әкеліп, жұмысын жолға қояды.

– Таудың теріскей бетін сағалай өсетін қарағай – есік-терезе жасауға пайдаланатын негізгі материал. Қарағайдан жасалған бұйымдар ауаға адамдардың денсаулығына жағымды әсер ететін фитонид бөліп шығарады. Жазда ыстыққа, қыста суыққа төзімді. Қазіргі кезде сұранысқа ие бөлмеаралық ағаш есіктер жасаумен айналысып жатырмын, – дейді кәсіпкер.

Қазір оның жасаған дүниелеріне тапсырыс берушілер қатары көбейіп отыр. Кәсіпкер де тұтынушы көңілінен шығуға әрекет етіп отыр.