Қар тазалауға жаппай жұмылып жатыр
Облыс орталығын соңғы күндері жауған қалың қардан тазартып үлгермей жатқан коммуналдық қызметке қаладағы өзге кәсіпорындар да көмекке келуде. Бұл ретте 77 бірлік техника қосымша күш ретінде жұмылдырылып отыр.
Қардың шамадан тыс қалың жаууына байланысты коммуналдық мекемелер жұмысы тәуліктік режимге көшкен. Тек соңғы екі тәулікте ғана 50-60 см қалыңдықта қар жауған. Күн сайын қаланы қардан тазарту үшін 124 адамдық екі ауысым үзіліссіз жұмысқа шықса, олармен бірге 14 грейдер, щеткасы бар 24 МТЗ тракторы, 15 құм шашқыш, 4 тиегіш, 9 жүк көлігі жұмыс істеуде.
Алайда, бұл күштер қаланы қардан толықтай тазартып, тұрақты көлік қозғалысын қамтамасыз етуге әлі де жеткіліксіз еді. Соған орай өткізілген арнайы жиын барысында облыс әкімі Даниал АХМЕТОВ қардан тазалау бойынша арнайы құрылған штабқа бірінші кезекте Өскемен қаласын қардан тазарту үшін қосымша техникаларды ұйымдастыруға тапсырма берді.
Осыған байланысты қалалық әкімдіктен хабарланғандай, қала кәсіпорындарынан қар тазалауға қосымша 77 бірлік техника көмекке келген. Атап айтарлығы, бұл істен тұрғындар да шет қалмай, көшелерді қардан тазартуға көмектесіп жатыр. Белсенді жастар барлық тұрғындарды көмекке шақыруда.
Көп болып жұмылғанның нәтижесінде, Өскемен қаласының орталық көшелері қардан аршылып, қоғамдық көліктердің еркін жүруіне мүмкіндік ашылды. Олар штаттық режимде жұмыс істеп тұр. Көшелерге, алаңқайларға, автобус аялдамаларына, жаяу жүргіншілер жолына, кіреберіс баспалдақтарға көктайғаққа қарсы құм себілуде.
Өскемен қалалық әкімдігі ұсынған соңғы мәліметтерге жүгінер болсақ, қала бойынша жиыны 6700 текше метр қар шығарылған. Енді трамвай жолдарын тазалау жалғасуда. Оған трамвай паркінің, «Өскемен-су арнасының», «Өскемен жылу жүйелерінің» қызметкерлері тартылған. Бұған қоса грейдерлер мен тракторлар көмекке келген.
Қазіргі уақытта №2 маршруттағы трамвай желісі іске қосылды, енді №3 маршрутты іске қосу жоспарлануда. Одан соң №1 және №4 бағыттар бойынша да тиісті жұмыстар атқарылады.
Қар тазалау жұмыстары қала бойынша Абай, Сәтпаев даңғылдарында, Орджоникидзе, Протозанов, Белинский көшелерінде, Красин кентінде және Ахмер, Нұрлы көш ауылдарында жалғасын табады.
Дәурен Аллабергенұлы
