АН-2 жедел ұшағы алыс ауылдарға қызмет көрсететін болады

Семей қаласының санитарлық авиация қызметі АН-2 ұшағына ие болды. Бұл сала мамандарының жұмысын жақсартуға арналып отыр. Санитарлық авиация қызметі басшылығының айтуынша, ұшақтың мүмкіндігі тікұшақпен салыстырғанда, тіптен мол.
Уақыт үнемдеу тұрғысынан да, дәрігерлер мен науқастарға арналған орындар саны жағынан да ұтымды. Санавиация қызметі меңгерушісінің пікіріне сүйенсек, егер қызмет мамандары жемісті жұмыс істесе, Денсаулық сақтау және әлеуметтік даму министрлігінің тапсырмасына сәйкес шалғайдағы аудандарға да қызмет көрсетіледі. Бұл халық үшін аса тиімді болмақ. Елбасы тұрғындардың өмір сүру деңгейін арттырып, ұзақ өмір сүруді жолға қою қажеттігін ұсынып, ол үшін алғашқы медициналық-санитарлық көмек, санитарлық авиация саласын дамытуға кеңес берген берген. Жаңа ұшақ Елбасымыздың халық денсаулығын жақсарту бойынша берген тапсырмаларына сәйкес атқарылып жатқан шаралардың нәтижесі. Ұшақ Тараздың «Тараз Жаңа Әлем» компаниясынан жеткізілген. Енді Семей қаласынан шалғайдағы Абыралы өңірі, Абай, Бородулиха, Бесқарағай аудандары, Шар, Курчатов сынды қалалардың жедел медициналық көмекке зәру тұрғындары шұғыл түрде қалаға жеткізілетін болады. Бұған дейін Семей қаласының санитарлық авиация қызметі мамандарына өткен жылдың сәуір айында тікұшақ берілген. Әуе көлігі семейліктерге қызмет еткен қысқа мерзім ішінде санавиация мамандары нәтижелі жұмыс көрсеткішін байқатқан.
– Тікұшақ берілген уақыт аралығында 41 рет әуеге көтеріліп, оның ішінде 39 науқасты қаладағы онкологиялық, кардиологиялық орталыққа, перзентханаларға жеткізіп, медициналық көмек көрсетуге мүмкіндік жасадық. Үш ай уақыт аралығында сонша адамға көмек көрсету өте жақсы көрсеткіш деп ойлаймыз, – дейді Семей қаласы санитарлық авиациясы қызметінің меңгерушісі Нажия Пронина.
Санитарлық авиация негізінен жүкті әйелдер мен балаларға, жүрек-қан тамырлары, инсульт сияқты дертке шалдыққан науқастарға, жол-көлік оқиғасынан зардап шеккендерге қызмет етеді. Оларға қаладағы білікті мамандармен жасалған келісімшарт негізінде медициналық мекемелерде тиісті жәрдемдер беріледі. Жаңа ұшақ әзірге қызметіне толық кіріскен жоқ. Қазіргі таңда ұшақты медициналық жабдықтармен қамтамасыз ету ісі қолға алынып жатыр.

Раушан Нұғманбекова

Семей.