«Алтай-Ертіс кітапханасының» үшінші топтамасында 16 кітап жарық көрді
Өскемендегі А.Пушкин атындағы облыстық кітапханада «Алтай-Ертіс кітапханасы» сериясы бойынша шығып жатқан кітаптардың үшінші топтамасының тұсауы кесілді. Тұсаукесерге облыс әкімінің орынбасары Жақсылық Омар, ақын, Мемлекеттік сыйлықтың лауреаты Ұлықбек Есдәулет, профессор Арап Еспенбетов бастаған бірқатар ақын-жазушылар мен ғалымдар қатысты.
«Бұл ән бұрынғы әннен өзгерек» демекші, үшінші топтаманың бұрынғы топтамалар мен салыстырғаны көтерген жүгі салмақтырақ болып отыр. Өйткені, бұл жолғы шыққан кітаптар Ұлы Жеңістің 70 жылдығы, Абай Құнанбайұлының 170 жылдық мерейтойы, Қазақстан халқы Ассамблеясының 20 жылдығы сынды қой жылының еншісіндегі елеулі шаралардың құрметіне арналған.
Айталық, топтамаларға Абайдың барлық өлеңдері, Мұхтар Әуезовтің «Абай жолы» эпопеясы, белгілі абайтанушы Қайым Мұхамедхановтың, Арап Еспенбетовтің еңбектері, Бауыржан Ерденбековтің құрастыруымен жарық көрген Әріп Тәңірбергенұлының шығармалары енген. Партизан – жазушы Қасым Қайсенов, Әзілхан Нұршайықов, Әди Шәріпов сынды батыр тұлғалардың ерлік пен ұлттар ынтымағын әспеттеген шығармалары да оқырман назарына қайта ұсынылған. Белгілі жазушы, жерлесіміз Мүсілім Құмарбекұлының Кеңес Одағының батыры Ізғұтты Айтықовтың өнегелі өмірін кестелеген «Тауқымет» романы да қалың жұртшылықпен қайталай қауышып отыр. Сондай-ақ, «Шығыс Қазақстан кітаптары – 2014» деп аталған бұл шараның барысында Ауған соғысында қаза тапқан жауынгерлерге арналған «Азалы кітап» пен «Шығыс Қазақстан» энциклопедиясы кітаптарының да тұсауы кесілді.
– Биыл елімізде бірнеше маңызды даталар аталып өтеді. Бұл шараларды біз бүгінгі жетістігімізді тойлау емес, ертеңімізді ойлау деп қабылдауымыз керек. Міне, сол шаралардың өңіріміздегі бастамасы деп осы кітаптардың тұсаукесерін атауға болады. «Алтай-Ертіс кітапханасы» сериясына облыстық бюджеттен 51 миллион теңге қаржы бөліп, жерлес ақын-жазушыларымыздың сапалы да, мазмұнды 57 мың дана кітабын басып шығардық. Осындай қаржыға кітаптар шығарып жатқан соң оқырмандардың саны кемінде 5 пайызға өсуі керек, – деді өзінің құттықтау сөзінде облыс әкімінің орынбасары Жақсылық Омар.
Әкім орынбасары шара барысында өткен жылы құрастырылған 18 дискіден тұратын Шығыс Қазақстанның музыкалық антологиясын да таныстырып өтті.
– Өз өңірінің ақын-жазушыларын ұлықтау бізден басқа да бірнеше облыстарда қолға алынып жатқан үлкен жоба. Әуелде бұл жобаға үрке қараған атқамінер азаматтар да болды. Бірақ бұл – жершілдік емес, қайта кітабын шығара алмай арманда кеткен ақын-жазушыларымыздың бай мұрасын жинау, ұлықтау. Мен осы ойымды облыстың бұрынғы әкімі Бердібек Мәшбекұлына айтқанымда, құптады. Қазір 60-қа жуық кітап шықты. Үшінші топтамада 16 кітап жарық көрді, – деді жоба авторы Ұлықбек Есдәулет.
Ғалымдар Арап Еспенбетов, Бауыржан Ерденбеков, жазушы Б. Щербаков бастаған азаматтар бұл жобаның жалғаса беруіне ниеттес екенін білдіріп, өз ұсыныстарын айтса, Қайым Мұхамедхановтың ұлы Қанағат әкесінің еңбектерін ұлықтап жатқаны үшін алғысын білдірді. Хабиба Ақжігітова бастаған кітапхана қызметкерлеріне Ауған соғысының ардагерлері де алғысын айтып, арнайы төсбелгімен марапаттады. Шара соңында кітаптары жарық көрген ақын-жазушыларға өңір өнерпаздары ән-жырдан шашу шашып, оқырмандар жаңа кітаптармен танысты.
Мұратхан Кенжеханұлы
