Алпыс миллион теңгенің көмегін көрсетті

Азамат Темірбеков

 Әлеуметтік жауапкершіліктің маңызын түсіне білген бородулихалық кәсіпкерлер биыл жыл басынан бері 60 миллион теңгеге жуық меценаттық көмек көрсеткен.

Әр өңірдің әлеуметтік-экономикалық дамуында маңызды орын алатын бағыттардың бірі – меценаттық институты екені белгілі. Бұл жағынан кенде емес Бородулиха ауданының атымтай жомарт азаматтары ағымдағы жылдың бірінші жартыжылдығында жалпы сомасы 60 млн. теңгеге көмек көрсеткен. Атап айтсақ, Балалар жылына орай Петропавл ауылындағы бизнестің әлеуметтік жауапкершілігі аясында «Еңбек» және «Отан» шаруа қожалықтарының басшылары демалыс саябағында және шағын орталықта жалпы сомасы 12 млн. теңгеге балалар ойын алаңдарын салды. Сонымен қатар А.Лехнер атындағы орта мектептің жарты ғасырлық мерейтойына орай жергілікті кәсіпкер білім ордасына құны 18 млн. теңгелік автобус сыйлады. Сонымен қатар ауыл тұрғындарының демалысын ұйымдастыру үшін Бородулиха ауылының тұрғындары, сондай-ақ аудандық мәслихаттың «Ауыл» партиясының депутаты Талғат Оразаевтың қатысуымен үлкен көлде жағажай жасалып, санитарлық тазалық жүргізілді. «Коростелевское» жауапкершілігі шектеулі серіктестігінің бастамасымен Коростели ауылының орталық бөлігін инфрақұрылымдық дамытудың бекітілген жоспары шеңберінде жалпы орта білім беру мекемесінде 5 млн. теңгенің «Демалыс саябағын қоршау және шағын сәулеттік безендіру» жобасы іске асырылып, жұмыстың бірінші кезеңі аяқталды. Екінші кезеңінде алаңға жұмсақ төсеніш төселіп, сахна салынбақ, сондай-ақ саябақта орындықтар мен гүлзарлар орнатылатын болады. Бұл жұмыстар бюджет қаражаты есебінен жүзеге асырылатын болады.

Бұдан басқа аудан бойынша спорттық-дамытушылық, музыкалық жабдықтар сатып алынды, кентішілік жолдарды қысқы күтіп-ұстау, балалар алаңдарын жаңарту бойынша жұмыстар жүргізілді, барлық жерде тыл еңбеккерлеріне, мүгедектерге, зейнеткерлерге, аз қамтылған және көпбалалы отбасыларына материалдық және қаржылай көмек көрсетілді, мемлекеттік және халықтық мерекелерді өткізу кезінде де меценаттар тарапынан тұрақты демеушіліктер көрсетіліп отырады.

Биыл осындай атымтай жомарт жандардың бірі аудан орталығындағы көшелердің бірінің толықтай асфальт жабынымен жабылуына себепкер болды.

Талғат Оразаевты Бородулиха ауылының ғана емес, бүкіл аудан жұртшылығы біледі. Бородулиха аудандық мәслихатының депутаты – «Раушан» шаруа қожалығының тасын өрге домалатып отырған кәсіпкерлердің бірі. Іскер басшылығымен ғана емес, сонымен қатар меценат ретінде де белсенділігімен көзге түскен аудан азаматы.

Кәсіпкер жерлестерінің  өмірін түрлі жолмен жақсартуға тырысады. Жақында өз есебінен аудан орталығын абаттандыруға елеулі үлес қосып, ұзындығы 350 метр болатын Қажымұқан көшесі мен «Балдәурен» балабақшасының кіреберіс жолына асфальт төсетті.

Қарапайымдылықты басты қасиет санайтын шаруа қожалығының басшысы аталмыш жобаға шыққан шығындарды жария етпеуге шешім қабылдаған екен.

– Талғат Оразаев өзі тұратын округте ғана емес, аудан бойынша да көптеген жобаға демеушілік көмек көрсетеді. Оған шын жүректен, халықтың атынан алғыс, өмір жолына береке, ал істеріне сәттілік тілейміз, – деп Бородулиха ауылдық округі әкімінің аппараты аудан орталығының тұрғындары атынан алғыс білдірді.

Осы аптада осындай жомарт жандардың бірінің демеушілігімен Бородулиха  ауданында   тағы бір маңызды іс-шара өтіп, Уба-Форпост ауылында медициналық пункт ашылды. Ашылу салтанатына аудан әкімі  Ахметқали Нұрғожин арнайы барып, жерлестерін  құттықтады. Жергілікті меценат Николай Ровчак өз қаражатына ғимаратты жөндеп, қажетті жиһаз сатып алып, су құбыры мен кәріз жүйесін жаңартты. Осылайша, аудан орталығынан шалғай орналасқан Уба-Форпост ауылының тұрғындары медициналық көмек алу үшін алысқа сабылмайтын болды.

Көптеген игі істердің басында жүрген жомарт жан осылайша ауылдастарының алғысына бөленді. Қазір аталмыш медициналық пунктте емшара кабинеті, егу бөлмесі, әйелдерді қабылдайтын кабинеттер қажетті құрал-жабдықтармен жасақталған. Кәсіпкердің бұл ісіне разы болған аудан басшысы Ахметқали Нұрғожин жылы, жарық, таза әрі ыңғайлы ғимаратты сыйға тартып, ауданның дамуына, ауыл-аймақ медицинасының алға жылжуына, ауылдастардың денсаулығын жақсарту ісіне қосқан үлесі үшін кәсіпкерге алғыс білдіріп, өзіне денсаулық, отбасына амандық тіледі.

/Материал Бородулиха аудандық ішкі саясат бөлімінің тапсырысы бойынша әзірленді/.