Ақгүл Ахметқызы:-Жаңалықтардан Әсемнің тірі қалғанын естігенде төбеміз көкке жеткендей болды

Жамбыл облысында болған ұшақ апатынан құдай сақтап аман қалған Әсем Шаяхметова – Катонқарағай ауданының тумасы. Бүгінде Балқаш қаласындағы «Қазақмыс» компаниясында қызмет атқаратын Әсем әуе апаты салдарынан дене жарақаттарын алып ауруханада жатыр. Әке-шешесі қыздарының қасында отыр.
Қазір Әсемнің жағдайы жақсы болғанымен, екі аяғына ота жасау керек. Апат кезінде бір аяғы тізеден төмен сынса, екінші аяғы екі жерден ашық сынған. Оның үстіне көп қан жоғалтқан.

«Қазақмыс» компаниясында бас геолог болып жұмыс істейтін Әсем Шаяхметова әріптестерімен АН-2 ұшағына отырып Шу ауданын бетке алады. Бірақ діттеген жеріне жетпей құлаған ұшақтың сау тамтығы қалмаған. Әсемнің есінде ұшақтың гүрс етіп жерге құлағаны ғана. Ес-түссіз жатып қалса керек, бірнеше сағаттан кейін өз-өзіне келеді. Ұшақтың астан-кестеңі шығыпты. Жым-жырт. Ұшқыштың ұялы телефонына әлдекім қоңырау соғып жатқан сияқты. Қозғалайын десе, бір аяғы мүлдем жансыз. Екінші аяғы да сырқырап барады. Жаралы қыз ауырған аяғына қарамастан ұшқыштың ұялы телефонына жетіп, төтенше жағдай қызметкерлеріне хабарласқан. Алғашында сенбеген олар Әсемнен ұшақтың қай жерге құлағанын сұрапты. Одан кейін директорына қоңырау шалып болған жайды түсіндірген.
Күн боран. Айдала. Ымырт үйіріліп барады. Құтқарушылар құлап жатқан ұшақты бірден байқамаған. Әсеммен байланысқа шығып отырып, екі сағат дегенде әзер жеткен. Сол уақыт ішінде 29 жастағы қыз бір метрден астам қарды қазып далаға шыққан. Үнсіз жатқан әріптесін тірі деп ойласа керек, жылы денесін құшақтап отыра берген. Құтқарушылар келгеннен кейін Әсемге алғашқы көмек көрсетіп, ұшақтың сынған қанатына салып көлікке дейін әкелген. Қалың қарда құтқарушылар да біраз қиындық көрген сияқты. Апат орнынан жаралы қызды Шу қаласының ауруханасына апарып, ертеңінде санитарлық авиациямен Астана ауруханасына жеткізеді. Сол жерде ем-домдарын қолданып ота жасайды. Анасы Ақгүл Ахметқызының айтуынша, Әсемнің жағдайы бірқалыпты.
– Әсем сағат сайын қоңырау шалып, халімізді біліп отыратын. Сол күні ұшаққа отыратын кезде де қоңырау шалды. Мен ұлымды Астанаға шығарып салайын деп киімдерін жинастырып жүріп, қызыммен хабарласуды ұмытып та кетіппін, – деп бастады әңгімесін анасы Ақгүл. – Кешке қарай үйдегілер шай ішіп, ас үйде отырған. Бір кезде теледидардан ұшақтың құлағанын естіп не істерімізді білмей қалдық. Әсемге хабарлассам, ұялы телефоны сөніп жатыр. Жаңалықтардан қайтыс болғандардың тізімін де бірден айтпады. Ұлым екеуміз интернеттен сол оқиға туралы ақпараттың бәрін қарап шықтық. Анық ақпарат жоқ. Сол екі ортада қан қысымымыз көтеріліп, жүрегіміз ауырып, өзімізді қоярға жер таппадық. Ақыры жаңалықтардан Әсемнің тірі қалғанын естіп төбеміз көкке жеткендей болды. Әттең, ұшарға қанатымыз жоқ. Жолға ертеңінде шықтық. «Қазақмыс» компаниясы жол шығындарын мойындарына алып, Шуға барып, қызымызбен қауыштық, – деп анасы сол алабұртқан сәтті әңгімелеп айтып берді.
Тағы бір таңғаларлығы, ажалдан аман қалған Әсем әріптестерінің қаза болғанын түсінде көрген. Түсінде олар Әсемге келіп: – Біз сенімен біргеміз. Мықты бол! – деген екен.
Алапат апат кезінде жасымай, қайсарлық танытып құтқару тобына хабар берген Әсемнің ауруханадан қашан шығатыны әлі белгісіз.

Мерей Қайнарұлы