Қадір түні аспанда «Мұхаммед» деген жазу көрінді

Мың айдан да қайырлы Қадір түнінде Ұлан ауданы, Алмасай ауылының имамы Ербол Амирхановтың ұйымдастыруымен мешітте ораза тұтқан жамағатқа ауызашар мен сәресі берілді. Мешітке жиналған жамағат құлшылық жасап, тарауық намазын оқып, имандылық жайында уағыз тыңдап, Аллаға мінәжәт етті.
Қадір түнін мен де отбасыммен бірге мешітте қарсы алдым. Таң рауандап атып келе жатқан. Мешіттен сыртқа шыққанымыз сол еді, кенет аспандағы жұлдыздардың шоғырланып, жарқырай жанғанын көзіміз шалды. Артынша аспанда жазуға ұқсас кескін пайда болды. Мешіт имамы оның араб тілінде пайғамбарымыздың есімі – «Мұхаммед» деген жазу екенін айтты. Дереу фотосуретке түсіріп алдым. Бұл таңғажайып құбылысты сол жердегі барша жамағат көздерімен көрді.

Ауыл қариялары бұл жаратылыс жұмбағының сырын отыз күн ораза ұстап, ғибадат-құлшылықтарын үзбеген жамағатқа қасиетті Қадір түнінде Жаратушының жіберген белгісі ретінде түсіндіреді.
Шындығында, бұл ғажап құбылыс кімді де болмасын ойландырмай қоймасы анық. Соңғы кезде мұндай жағдайлар ел ішінде жиі кездесіп жүр. Мәселен, «Алла» деген жазуы бар қозының және бұзаудың дүниеге келуі, тауық жұмыртқасында Жаратушы есімінің жазылуы сияқты оқиғалар адамдарға Раббысының жіберілген белгісі екеніне ешкім дау айта қоймас.

Эльмира Ахметова

Ұлан ауданы.