5,2 миллион адам шот анықтамасын сайт арқылы алады

Бірыңғай жинақтаушы зейнетақы қорының салымшылары мен алушылары жеке зейнетақы шотынан үзінді көшірмені кез келген уақытта (электрондық тәсілмен) тегін алуға құқылы. Бұл – заң жүзінде бекітілген құқық.

Бүгінде зейнетақы жинақтарының жай-күйі туралы анықтаманы мынадай тәсілдермен алуға болады:

1) БЖЗҚ-ға тікелей келіп өтініш беру;

2) электрондық тәсіл, оның ішінде:

– үзінді көшірме БЖЗҚ-ға ұсынылған электрондық мекенжайға жіберіледі. Салымшы (алушы) таңдап алынған кестеге сәйкес зейнетақы шотынан үзінді көшірмені: ай сайын, үш ай сайын, жарты жылда бір рет немесе жыл сайын алады;

– логин мен пароль (құпия сөз) немесе электрондық цифрлық қолтаңбаның көмегімен, Қор сайтының жеке кабинеті арқылы;

– электрондық үкімет порталының жеке кабинеті немесе бір реттік sms-пароль арқылы, мұнда sms-пароль mGov мобильді азаматтар базасында тіркелген салымшылар мен алушылардың ұялы телефонына жіберіледі;

3) дәстүрлі пошта байланысы арқылы.

Ақпарат алу тәсілін таңдау үшін салымшы жеке басын куәландыратын құжатпен БЖЗҚ кеңсесіне келеді. Электрондық цифрлық қолтаңба болған жағдайда, ақпарат алу тәсілін Қор сайтының жеке кабинетінде таңдауға немесе өзгертуге болады.

– Жеке зейнетақы шотының жай-күйі туралы анықтаманы электрондық пошта арқылы алу тәсілін 800 мыңнан астам салымшы таңдаған. 2018 жылы оларға, шамамен, 5,6 млн. хабарлама жіберілді. 2019 жылдың 1 қаңтарына қарай 5,2 млн адам зейнетақы шотының жай-күйі туралы анықтаманы Қордың enpf.kz сайтының жеке кабинеті арқылы алу мүмкіндігіне ие, – дейді «Бірыңғай жинақтаушы зейнетақы қоры» АҚ облыстық филиалының директоры Мамыралы Мәмбетов.

Оның айтуынша, бір жыл ішінде интернет-хабарландыру тәсілін таңдағандар саны 1,2 млн. жуық адамға көбейген. Бұл тәсіл, шынында да, өте ыңғайлы. Зейнетақы шотының жай-күйі туралы анықтаманы кез келген жерде аптасына 7 күн, тәулігіне 24 сағат бойы жедел түрде алып тұруға болады.

Естеріңізге салсақ, алғашқы жылдары салымшылар мен алушылардың көпшілігі зейнетақымен қамсыздандыру туралы шарт жасасу барысында шоттан анықтама алу тәсілі ретінде пошта байланысын таңдаған болатын. Бұл ретте зейнетақы шотынан үзінді көшірме салымшылар мен алушыларға жылына бір рет жіберіледі. Ал пошталық мекенжай өзгерген жағдайда, бұл туралы Қорға міндетті түрде хабарлау қажет. Егер хабар берілмесе, БЖЗҚ бұдан кейін зейнетақы жинақтары туралы анықтаманы жібермеуге құқылы. Сонымен қатар шоттарында ақша жоқ салымшылар мен алушыларға үзінді көшірме жіберілмейді.

Дәурен Аллабергенұлы