Азамат Темірбеков

Ертеңгі күнді ешкім болжай алмайтыны белгілі, өйткені кез келген адам ойламаған жерден өмірде қиын жағдайға тап болуы мүмкін. Үйі өртеніп, я болмаса, басқа да тұрмыстық қиындықтарға тап болған адамның қолдаусыз қалмағаны өте маңызды. Осыны ескерген жармалықтар мұндай жандарға көмектесудің тетіктерін іске қосқан.

Шар қаласының тұрғындары ерлі-зайыпты Сандуғаш Кенжебаева мен Мерей Қалиев – мұндай қолдаудың қажеттігіне көзі жеткен отбасының бірі. Өйткені былтыр көктемде олардың үйі өртеніп, бір шаңырақ далада қалған болатын. Шырт ұйқыда жатқан ерлі-зайыптылар түн ортасында терезеге түскен жарықтан оянып кетеді. Сөйтсе, көрші орналасқан ғимарат өртеніп жатыр екен. Өрт сөндірушілер жеткенге дейін тілсіз жау олардың үйін де шарпиды. Құтқарушылар қанша тырысса да, бұл отбасының үйін аман сақтап қалу мүмкін болмады. Осылайша бір түнде бүтін бір отбасы баспанасыз қалды.

– Түтінге тұншықпай, отқа күймей өзіміздің аман қалғанымызға шүкір дейміз. Бірақ он жыл бойы жинаған дүние-мүлкіңнің әп-сәтте күлге айналғанын көрудің қаншалықты қиын екенін екінің-бірі біле бермейді. Сол сәтте үйіміз өртеніп, бейнебір отбасымыздың бір мүшесінен айырылып қалғандай күй кештік, – дейді Сандуғаш Кенжебаева.

Төрт пәтерлі тұрғын үйдің орнында күл ғана қалды. Бұл жерде жалғыз баспанасынан айырылған тұрғындардың қандай күй кешкенін айтып-жеткізу тіптен мүмкін емес. Дегенмен жапа шеккен отбасылардың алдында бұл тығырықтан жедел шығып, тұрмысты қалпына келтіру мақсаты тұрды. Ал басқа баспанаға көшу мәселесі ұзақ уақыт бойына ашық күйінде қалды. Жапа шеккен тұрғындарға жергілікті биліктен, әлеуметтік желілер арқылы көпшіліктен көмек сұрауға тура келді.

Міне, осы кезде күтпеген жерден бұл мәселе сәтті шешіле қалды. Баспана сатып алуға қаражатты Жарма ауданының әлеуметтік-мәдени дамуын қолдауға арналған «Береке» қоры бөлді. Жергілікті атқарушы органдардың хабарлауынша, аталмыш қор жер қойнауын пайдаланушы кәсіпорындар арқылы толығып отыратын көрінеді. Олардың арасында қазірде аудан аумағында жұмыс істеп жатқан Бақыршық тау-кен байыту комбинаты да бар.

Жергілікті билікпен жасалған әлеуметтік серіктестік меморандумы аясында Бақыршық тау-кен байыту комбинаты тұрғын үйге мұқтаж отбасылардың тұрмыстық жағдайларын жақсарту үшін 40 миллион теңге бөлді. Осылайша, игілікті істің қайырын бірінші болып Шар қаласындағы өрттен жапа шеккен отбасылар көрді.

Сандуғаш пен Мерей баспаналы болатындарына бірден сенбеді.

– Өрттен кейін біз үш ай менің ата-анамның үйінде тұрдық, – дейді Сандуғаш Кенжебаева. – Шынымды айтсам, осы уақыт аралығында қандайда бір қолдау болатынына сенген жоқпыз. Бізді әкімдікке шақырып, демеушілердің көмегімен бізге үй берілетінін айтқанда төбем көкке жеткендей болды. Жолдасым екеуіміздің еңсеміз көтеріліп, қуанышымыз қойнымызға сыймады. Осындай қолдау көрсеткен адамдарға алғысымыз мол.

Қыркүйек айында бұл отбасы қоныстойын тойлатты. Өстіп, олар ауласы бар үш бөлмелі жеке тұрғын үйге қол жеткізді. Өткен күндерді еске түсіргісі келмеген жанұя қазір біртіндеп тұрмысын қалпына келтіре бастаған. Олар бүгінгі басты мақсат өткенге қайғыру емес, барлығын қайтадан бастап, жаңа әрі жайлы өмірді қалыптастыру екенін айқын түсінді.

Үш баланың анасы Любовь Прохорованың өмірін де жеңіл деп айтуға келмес, өйткені ол жастайынан тағдырдың тауқыметін тартып өсті. Үлкен отбасынан шыққан ол балалар үйінде тәрбиеленді. Сол себепті ол бала кезінен мықты отбасын құрып, балаларын өсіруді қалады. Дей тұрғанмен 14 жыл отасқан күйеуімен ажырасқан ол кішкентай балаларымен жалғыз қалады.

– Біз тұрған үй бұрынғы күйеуімнің туыстарына тиесілі еді. Ажырасқаннан кейін онда қала алмадым. Жалдап тұруға үш баламен жағдайым болмады. Не істерімді білмей, салым суға кетті, – дейді Любовь Прохорова.

Осы кезде ол жергілікті әкімдік пен тау-кен байыту комбинатына көмек сұрап жүгінеді. Өйткені ол комбинатқа қызмет көрсететін мердігер мекемелердің бірінде жұмыс істейтін. Көп ұзамай кәсіпорын жалғызбасты әйелге бірінші кезекте пәтер бөлу туралы шешім қабылдады.

Бұл отбасына да осыған дейін айтып өткен «Береке» қоры қаражат бөліп, тұрғын үй сатып алуына мүмкіндік жасады. Осылайша қыркүйек айынан бері Любовь Прохорова балаларымен шағын ауласы бар үш бөлмелі тұрғын үйде тұрып жатыр.

– Баспаналы болғанымызға өте қуаныштымын. Бұл қуанышымды айтып жеткізе алмаймын, өйткені өмірімде алғаш рет өз үйіме өзім иелік ете алатын мүмкіндікке қол жеткіздім, – деп ағынан жарылды Любовь Прохорова.

Жарма ауданы.